Bangladesh bıligi eks-premer-mınıstrdiń banktegi jeke seıfinen 10 kg altyn tárkiledi
ASTANA. KAZINFORM — Bangladeshtiń jemqorlyqqa qarsy organdary burynǵy premer-mınıstr Sheıh Hasınaǵa tıesili bank uıashyǵynan shamamen 10 kılogramm altyndy tárkilep aldy. Onyń jalpy quny 1,3 mıllıon dollar shamasynda baǵalanyp otyr.
Ulttyq salyq keńesiniń Ortalyq barlaý bólimi ókilderiniń málimdeýinshe, altyn qyrkúıekte tárkilengen banktik seıfterdi ashqannan keıin tabylǵan.
— Sot sheshimi boıynsha seıfterdi ashyp, burynǵy premer-mınıstrge tıesili shamamen 9,7 kılogramm altyn tabyldy, — dep habarlady AFP agenttigine aty-jónin jarııalaýdy qalamaǵan CIC joǵary laýazymdy qyzmetkeri.
Tárkilengen zattardyń ishinde altyn monetalar, quımalar jáne áshekeı buıymdar bar.
Tergeýshilerdiń aıtýynsha, Hasına bılik basynda bolǵan kezinde alǵan keıbir syılyqtaryn zań talap etkendeı memlekettik qorǵa ótkizbegen.
Ulttyq salyq keńesi sondaı-aq salyqtan jaltarý derekterin tekserip, tárkilengen altyn Hasınanyń salyq deklaratsııalarynda kórsetilgen-kórsetilmegenin anyqtap jatyr.
Aıta keteıik, osy aıdyń basynda Halyqaralyq qylmystyq trıbýnal Hasınany stýdentter kóterilisin kúshpen basqan qylmysy úshin ólim jazasyna kesken bolatyn. BUU deregi boıynsha, Hasına bılikti saqtap qalýǵa tyrysqan kezdegi oqıǵadan 1 400 adamǵa deıin qaza tapqan.