Bangladesh astanasynda bolǵan tártipsizdikter kezinde 50 adam zardap shekti
ASTANA. KAZINFORM – Bangladesh astanasy Dakkada eldiń burynǵy premer-mınıstri Sheıh Hasınaǵa úkim shyǵarylǵan soń bastalǵan tártipsizdikter saldarynan polıtsııa men áskerdi qosa alǵanda 50 adam zardap shekti. Bul týraly Dhaka Tribune basylymyna silteme jasap, reseılik TASS habarlady.
Dakkadaǵy Dhanmondı kóshesi 32 aýdanynda respýblıkanyń negizin qalaýshy sanalatyn Sheıh Hasınanyń ákesi Sheıh Mýdjıbýr Rahmannyń burynǵy rezıdentsııasy, búginde mýzeı bolǵan jerge júzdegen adam jınaldy. Olardyń basym bóligi stýdentter bolatyn jáne olar mýzeı ǵımaratyn buzyp tastamaq nıette edi. Osy maqsat úshin olar ózderimen býldozer aıdap kelgen. Polıtsııa aktsııaǵa qatysýshylardyń arnaıy qoıylǵan kedergilerden (barrıkadalar) ótip, mýzeı aýmaǵyna kirýine qarsylyq kórsetti.
Tobyrdy taratý úshin quqyq qorǵaý qyzmetkerleri kózden jas shyǵaratyn gaz ben qatty dybys shyǵaratyn granata qoldandy. Tártipsizdikter birneshe saǵatqa sozyldy. Buqaralyq aktsııaǵa qatysýshylar ǵımaratqa kirip alyp, Sheıh Hasınanyń ákesiniń rezıdentsııasy buzylmaıynsha, ketpeıtindikterin málimdedi. Polıtsııa men áskerıler áli aýdandy sholyp júr.
Dúısenbi kúni Bangladeshtiń Halyqaralyq qylmystyq ister jónindegi trıbýnaly Sheıh Hasınany adamzatqa qarsy qylmystary men 2024 jylǵy buqaralyq kóterilisti basyp tastaǵany úshin ólim jazasyna kesti.
Sot ony adamzatqa qarsy qylmys jasady dep taqqan bes túrli aıyptyń barlyǵyna kináli dep tapty.
Ólim jazasyna sonymen qatar Bangladeshtiń burynǵy Іshki ister mınıstri Asadýzzaman Han Kamal da kesildi. Osy is boıynsha tergelgen polıtsııanyń burynǵy bas ınspektory Choýdhýrı Abdýlla Al Mamýn 5 jylǵa bas bostandyǵynan aıyryldy. Ol osyǵan deıin tergeýge kómektesýge nıet bildirip, óziniń kinásin tolyq moıyndaǵan bolatyn.
Osyǵan deıin Bangladeshtiń burynǵy premer-mınıstri ólim jazasyna kesilgeni týraly jazdyq.