Bangkoktegi jaǵdaı - áskerılerdiń baqylaýynda
ASTANA. Mamyrdyń 17-si. QazAqparat - Taıland elordasyndaǵy jaǵdaı áskerılerdiń baqylaýynda jáne «komendanttyq saǵat engizýge qajettilik joq». Bul týraly jeksenbi kúni Bangkoktyń Tótenshe jaǵdaılar ortalyǵynyń Qolbasshylyǵy málim etti,
dep habarlaıdy ITAR-TASS agenttigi.
«Biz kisi qurbandyqtarynyń bolǵanyn qalamaımyz», - dep atap kórsetti ókimet ókilderi. Munyń aldynda úkimet Bangkoktyń birqatar aýdandarynda komendanttyq saǵattyń engizilgenin málim etken bolatyn. Sonymen qatar, tótenshe jaǵdaı rejımi týraly zańnyń kúshi taǵy 5 provıntsııaǵa keńeıtilip, nátıjesinde qaýipsizdiktiń aıryqsha sharalary koroldiktiń 20 provıntsııasyn qamtyp otyr.
Bangkokte armııa men manıfestshilerdiń arasynda úsh táýlik boıy jalǵasqan qaqtyǵystardyń barysynda 29 adam qurban bolyp, 220-dan astam adam jaraqat alǵan. Bul týraly jýrnalısterge Qutqarý ortalyǵynan habarlady.
Dıktatýraǵa qarsy demokratııa úshin oppozıtsııalyq birlesken maıdannyń jetekshisi Natavýt Saıkýa Birikken Ulttar Uıymyn «Taıland úkimetimen aradaǵy beıbit kelissózge araǵaıyn bolýǵa» shaqyrdy.
