Bangkoktan Qazaqstanǵa jańa áýe baǵyty iske qosylady
ALMATY. KAZINFORM – Almaty men Taıland arasynda jańa áýe baǵyty ashylady.
Bul týraly Almaty qalasynyń týrızm basqarmasy habarlady. Vedomstvo málimetinshe, Thai AirAsia X áýe kompanııasy 2025 jyldyń 1 jeltoqsanynan bastap Bangkok – Almaty tikeleı áýe baǵytyn iske qosady.
- Bul qadam Qazaqstan men Taıland arasyndaǵy týrızm almasýyn damytýǵa úlken múmkindik beredi. Jańa reıs Ońtústik-Shyǵys Azııa elderinen keletin saıahatshylar úshin Almatyǵa joldy jeńildetip, qalanyń Ortalyq Azııadaǵy týrıstik ortalyq retindegi bedelin arttyrady. Almatyda Thai AirAsia X basshylyǵymen ózara yntymaqtastyqty nyǵaıtýǵa baǵyttalǵan kezdesý ótti, - dep habarlady basqarmadan.
Eske salaıyq, bıyl Ońtústik Koreıanyń áýekompanııasy Inchhon men Almaty arasynda jańa reıs ashty.
Almaty áýejaıynyń málimetinshe, 2025 jyly áýe aılaǵy 12,5 mıllıon jolaýshyǵa qyzmet kórsetpek, olardyń jartysy — halyqaralyq baǵyttaǵy jolaýshylar.