Bangkoktaǵy sherýshiler Premerdiń rezıdentsııasyn basyp alýǵa qaýip tóndirýde
ASTANA. 7 aqpan. QazAqparat - Demokratııa úshin Halyqtyq alıanstyń jaqtaýshylary, nemese «saryjeıdeliler», eger úkimet usynylǵan talaptardy odan ári elemeıtin bolsa,
Bangkoktyń ortalyǵyn basyp alyp, Premerdiń rezıdentsııasyna shabýyl jasaıtyndyǵyn alǵa tartýda. Bul týraly búgin Demokratııa úshin Halyqtyq alıanstyń basshysy Chamlong Srımýang málim etti, dep habarlaıdy ITAR-TASS.
Demokratııa úshin Halyqtyq alıans «Kambodjamen shekaralyq janjaldy sheshe almaǵany úshin» Abhısıt Vetchachıvanyń kabınetin taratýdy talap etip otyr.
Soǵan qosa, Alıans úkimetti Búkiálemdik ıÝNESKO muragerligi komıtetinen shyǵyp, Kambodjamen shekarany belgileý boıynsha ózara túsinistik memorandýmyn joıýǵa shaqyryp otyr. Eki tarapqa da Preah Vıhear ǵıbadat ornynyń tıesiligi máselesi jáne Taıland pen Kambodjada shekarasyn anyqtaýdaǵy ishki saıası shıelinister ózekti bolyp otyr. Eki eldiń shekarasynda atystar úshinshi táýlik boıy jalǵasyp jatyr. Kambodja BUU Qaýipsizdik Keńesine iske aralasýǵa ótinish bildirdi.
Óz kezeginde, mınıstrler kabıneti atalǵan talaptardyń orynsyz ekenin áldeneshe ret qaıtalady. Abhısıt Vetchachıva, sonymen qatar, «merziminen buryn ornynan ketpeıtindigin jáne qazir Taılandtyń aýmaqtyq múddelerin barynsha qorǵap jatqanyn jetkizdi». Vetchachıva Demokratııa úshin Halyqtyq alıanstyń kelissózge bet burmaǵanyna tań qalǵandyǵyn bildirdi.
