Bangkoktaǵy Azııa chempıonatyna Qazaqstan boksshylary tolyq quramda qatysady
ASTANA. QazAqparat - 19-28 sáýir kúnderi Bangkokta jastar arasynda Azııa chempıonaty ótedi. 10 salmaq sanaty boıynsha ótetin baıraqty dodaǵa Qazaqstannyń erler jáne áıelder komandalary tolyq quramda qatysady, dep habarlaıdy QazAqparat.
«Aldaǵy qurlyq chempıonatyna qatysýshy elderdiń sany rekordtyq kórsetkish bolady. Onda Azııanyń 35 elinen kelgen 235 boksshy ózara myqtylardy anyqtaıdy. Jastar arasyndaǵy qurlyq birinshiligine Aýǵanstan, Shyǵys Tımor, Kambodja, Katar, Lıvan, BAÁ, Soltústik Koreıa ókilderi alǵash ret qatysady. Azııa chempıonattarynyń debıýtanty bolyp otyrǵan Shyǵys Tımor komandasyn erekshe tilge tıek ete ketken jón. Azııada bokstyń qulash jaıa damyp kele jatqany, árıne, qýantady», - deıdi Halyqaralyq áýesqoı boks qaýymdastyǵynyń (AIBA) vıtse-prezıdenti, Azııa boks konfederatsııasynyń prezıdenti Serik Qonaqbaev.
Uldar men qyzdar 10 salmaq sanatynda kúsh synasady. Onda tek Qazaqstan men Úndistan quramalary ǵana tolyq erler jáne áıelder komandalarymen óner kórsetedi.
«Osy chempıonatqa qatysatyn sportshylar Argentına astanasy Býenos-Aıreste ótetin olımpıadaǵa, sondaı-aq 2020 jyly Tokıoda ótetin olımpıadaǵa qatysýǵa basty úmitkerler bolyp tabylady», - deıdi S. Qonaqbaev.
Aıta keteıik, týrnırdiń jartylaı fınaly 26 sáýirde, fınaldyq kezdesýleri 27 sáýir kúni ótedi.
