Bangkoktaǵy geografııadan halyqaralyq olımpıadaǵa elimizden 4 oqýshy qatysyp jatyr

ASTANA. KAZINFORM — Taıland astanasy Bangkok qalasynda Geografııadan halyqaralyq olımpıada (International Geography Olympiad – IGeO) ótip jatyr. Bedeldi bilim saıysyna álemniń 50-ge jýyq elinen 200-den astam oqýshy qatysyp jatyr. Bul týraly Oqý-aǵartý mınıstrligi málim etti.

Vedomstvonyń málimetinshe, olımpıada 1 tamyzǵa deıin jalǵasady.

IGeO úsh kezeńnen turady: jazbasha test, mýltımedııalyq tapsyrmalar jáne dalalyq zertteý týry.

Qazaqstan ulttyq quramasy olımpıada rezervi múshelerinen jasaqtalǵan:
Aqjol Bolat – Taldyqorǵan qalasyndaǵy Nazarbaev Zııatkerlik mektebiniń 12-synyp oqýshysy;

Andreı Enbahtov – Qostanaı qalasyndaǵy Nazarbaev Zııatkerlik mektebiniń 10-synyp oqýshysy;

Alıhan Kalmagambetov – Aqtóbe qalasyndaǵy Nazarbaev Zııatkerlik mektebiniń 12-synyp oqýshysy;

Talǵat Baıbýsýnov – Qaraǵandy qalasyndaǵy Nazarbaev Zııatkerlik mektebiniń 12-synyp oqýshysy.

Qurama jetekshileri:

Abaı Dúısen – halyqaralyq jáne respýblıkalyq olımpıadalardyń jeńimpazy;
Rýstam Valeev – Q.Sátbaev atyndaǵy Qazaq ulttyq tehnıkalyq ýnıversıtetiniń 2-kýrs stýdenti.

Geografııadan halyqaralyq olımpıada 1996 jyldan beri Halyqaralyq geografııalyq odaqtyń (IGU) qoldaýymen uıymdastyrylyp keledi. Olımpıadanyń maqsaty – oqýshylardyń geografııa jáne qorshaǵan orta salasyna qyzyǵýshylyǵyn arttyryp, halyqaralyq yntymaqtastyqty nyǵaıtý. Qazaqstan bul jarysqa 2012 jyldan bastap turaqty túrde qatysýda. 2024 jyly elimizdiń quramasy 1 kúmis jáne 3 qola medal jeńip alǵan bolatyn.

Buǵan deıin habarlanǵandaı, Qazaqstan oqýshylary álemdegi eń bedeldi olımpıadada tórt medal jeńip alǵan bolatyn.