Bangkoktaǵy bardan órt shyǵyp, 27 adam qaza tapty
ASTANA. KAZINFORM — Órt 13 shildege qaraǵan túni Taıland astanasynyń soltústigindegi barlardyń birinde boldy, dep habarlaıdy Deutsche Welle.
Órt sóndirýshiler jarııalaǵan beınejazbadan pabtyń kireberisinen órttiń jalyndap turǵanyn, adamdardyń qutylýǵa tyrysyp jatqanyn kórýge bolady.
Bangkoktaǵy barda shyqqan órt saldarynan keminde 27 adam qaza tapty. Taıland premer-mınıstri Anýthın Chanvırakýn oqıǵa ornynda jýrnalısterge 27 adamnyń qaza bolǵanyn rastady.
Onyń aıtýynsha, birneshe zardap shegýshi aýrýhanaǵa jetkizilgen, al bılik órttiń shyǵý sebebin anyqtap jatyr. Mekemede óner kórsetken mýzykant saıasatkerge sahna mańyndaǵy elektr qalqanynan tútin shyqqanyn, artynsha jarylys bolǵanyn aıtqan.
Órttiń naqty sebebi barlyq qajetti saraptamalardan keıin belgili bolady. Resmı málimet boıynsha, órtti tolyq baqylaýǵa alý úshin órt sóndirýshilerge keminde jarty saǵat qajet bolǵan.
Buǵan deıin de Taılandta osyndaı qaıǵyly oqıǵalar bolǵan. 2022 jyly eldiń shyǵysyndaǵy mýzykalyq pabtaǵy órtten 14 adam kóz jumǵan. Al 2009 jylǵy jańa jyl túni Bangkoktaǵy Santika túngi klýbynda úı ishinde atylǵan otshashýdyń saldarynan shyqqan órtten 66 adam qaza taýyp, 200-den astamy jaralanǵan.
Sondaı-aq buǵan deıin Vetnamda týrıstik qaıyq apatynan 15 adamnyń qaza tapqany habarlanǵan edi.
