Bangkokta tótenshe jaǵdaı jarııalandy
ASTANA. 21 qańtar. QazAqparat - Taıland úkimeti merziminen buryn saılaý qarsańynda aýqymdy qarsylyq aktsııalaryna tosqaýyl qoıý úshin Bangkokte jáne oǵan irgeles aýdandarda tótenshe jaǵdaı rejimi engizilgenin jarııa etti.
Birqatar sheteldik BAQ-tyń habarlaýynsha, tótenshe jaǵdaı erteńnen bastap 60 kún boıy kúshinde bolady. Jarlyq úkimetke qarsylyq tanytýshylarmen kúreste zor ókilettik beredi. Atalǵan ókilettikterdiń qatarynda buqaralyq aqparat quraldaryn jiti baqylaýǵa alý, jappaı is-sharalarǵa shekteý qoıý, komendanttyq saǵat engizý jáne esh aıyp taqpastan kúdiktini ustaý bar.
Aıta keterligi, oppozıtsıonerler qazirgi bıliktiń 2 aqpanǵa belgilegen merziminen burynǵy saýlaýyna barynsha qarsylyq tanytýda. Olardyń paıymynsha, saılaý Taılandta ýaqytsha úkimet qurylǵannan keıin ǵana ótýi tıis. Osyǵan oraı eldiń Saılaý komıssııasy saılaýdy úsh aıǵa shegere turý usynysyn bergen edi. Alaıda Taılandtyń vıtse-premeri Nıvathamrong Býnsongpaısan mundaı stsenarııge qarsylyq tanytty.
