Bangkokta sý tasqyny kúsheıip, 50 aýdanǵa qaýip tóndi
ASTANA. KAZINFORM — Taıland astanasy Bangkokta nóser jańbyrdan keıin sý tasqyny bolyp, qalanyń barlyq 50 aýdanynda tótenshe jaǵdaı jarııalandy. Bul týraly Kazinform BBC-ge silteme jasap habarlaıdy.
24 qyrkúıekten beri Bangkokta jaýyn-shashyn mólsheri 300 mm-ge jýyqtaǵan. Nóser jańbyr saldarynan joldar men turǵyn úılerdi sý basyp, keı aýdandarda kólikter de jartylaı sýda qalǵan.
Qalanyń barlyq 50 aýdanynda tótenshe jaǵdaı jarııalandy. Bangkok gýbernatory Chadchart Sıttıpýnt bul jaǵdaı adam ómirine qaýip tóndirip, memlekettik jáne jeke múlikke zııan keltirýi múmkin ekenin aıtty.
Onyń sózinshe, ahýal ásirese astananyń shyǵys bóliginde qıyn. Arnalar sýǵa tolyp, bılik ókilderi sýdy soryp shyǵarýdy jalǵastyryp jatyr. Arnalardyń mańyndaǵy úılerde turatyn turǵyndar joǵary qaýip aımaǵynda. Olarǵa zattaryn joǵarǵy qabattarǵa kóterý usynyldy.
Meteorologtar demalys kúnderi Bangkokta naızaǵaıly jańbyr jaýyp, sonyń saldarynan basqa da arnalardyń sýǵa tolyp ketýi múmkin ekenin eskertti. Aldaǵy aptada da jańbyr jaýýy boljanyp otyr.
Bangkoktyń negizgi Sývarnabhýmı áýejaıy shtattyq rejımde jumys istep tur. Degenmen joldaǵy kúrdeli jaǵdaıǵa baılanysty jolaýshylarǵa áýejaıǵa ádettegiden eki-úsh saǵat erterek shyǵý usynyldy.
Áskerıler zardap shekken turǵyndardy ýaqytsha ornalastyrý úshin pýnktter men dalalyq ashanalar uıymdastyryp jatyr. Sý tasqynynan zardap shekkenderdi ýaqytsha ornalastyrý úshin mektepterdi de paıdalaný josparlanǵan.
Eske salaıyq, munyń aldynda AQSh-tyń shyǵys jaǵalaýyna daýyl, nóser jańbyr jáne sý tasqyny qaýpi tóngenin jazǵanbyz.
