Bangkokta opyrylyp qalǵan joldy qalpyna keltirý jumystary ýaqytsha toqtatyldy
ASTANA. KAZINFORM — Bangkok ákimi Chadchart Sıttıpýnniń málimetinshe, ınjenerler Samsen kóshesindegi oıyqty jabý úshin táýlik boıy 1500 tonnaǵa jýyq beton quıǵan. Alaıda quıylǵan betonnyń bir bóligi jer asty tonnel jelilerine ótip ketkeni anyqtalǵandyqtan, qalpyna keltirý jumystary dereý toqtatylǵan. Bul týraly Lianhe Zaobao basylymy habarlady.
Chadchart Sıttıpýn túsindirgendeı, mamandar alǵashqy quıylǵan beton tolyq qatqannan keıin ǵana jumysty qaıta jalǵastyra alady. Jospar boıynsha, jalpy kólemi 2400 tonna beton paıdalanylyp, sodan keıin turaqty qorǵanys retinde beton qabyrǵasy salynady.
Ákim jaǵdaıdyń baqylaýda ekenin atap ótti. Jer oıyǵynyń ózi turaqty kúıinde qalyp otyr, degenmen ótken túni shamamen 50 santımetrlik topyraq qozǵalysy tirkelgen. Bul qosymsha qıraýǵa ákelmedi. Qorshaǵan ǵımarattardyń beriktigi basty nazarda tur. Osyǵan baılanysty Samsen kóshesindegi metropolıten polıtsııa basqarmasy ǵımaraty men jaqyn mańdaǵy turǵyn úıler ýaqytsha jabyldy.
Eske salaıyq, 24 qyrkúıek kúni tańǵy saǵat 7 shamasynda Dýsıt aýdanyndaǵy Vadjıra aýrýhanasynyń aldynda Samsen kóshesi opyrylyp, uzyndyǵy men eni 30 metrdi, tereńdigi 50 metrdi quraıtyn alyp oıyq paıda boldy. Abyroı bolǵanda, apat saldarynan eshkim zardap shekken joq.