Bangkokta 14 jasar bala elge oq jaýdyrdy: úsh adam qaza tapty

Taıland astanasy Bangkoktaǵy «Sıam Paragon» saýda ortalyǵynda atys bolyp, úsh adam qaza tapty. QazAqparat bul týraly VVS aqparat agenttigine silteme jasap habarlaıdy. 

Oqıǵa saldarynan taǵy tórt adam zardap shekti. Olardyń arasynda shetel azamaty bar.

Shabýyl jasady degen kúdikpen 14 jasar jasóspirim ustalyp, polıtsııaǵa tapsyryldy.

Ol tapanshadan oq jaýdyrǵan dep shamalanyp otyr.

Shabýylǵa ne sebep bolǵany ázirge habarlanǵan joq.

El premer-mınıstri jaǵdaıdyń baqylaýǵa alynǵanyn aıtty.

Buǵan deıin áleýmettik jelilerde kelýshilerdiń saýda ortalyǵynan júgirip shyqqany kórinip turǵan kadrlar tarady.

Saýda ortalyǵy shuǵyl evakýatsııalanyp, jaqyn mańdaǵy «Sıam» metrosynyń stantsııasy sııaqty jabyldy.

Jelide saýda ortalyǵynyń ishinde túsirilgen beınejazbalar paıda boldy. Onyń birinde adamǵa toly keshende tórt ret oq atylǵanǵanǵa uqsas qatty dybys shyqqany anyq estilip tur.

Premer-mınıstr Sretta Tavısın qaza bolǵandar men olardyń otbasylaryna qaıǵyryp kóńil aıtty.

Taılandta basqa eldermen salystyrǵanda halyqtyń qolynda atys qarýy kóp bolǵanymen, jappaı atys oqıǵalary – sırek jaǵdaı.

Ótken jyldyń qazan aıynda eldiń soltústik-shyǵysyndaǵy Nong Býa Lamphý provıntsııasyndaǵy balalar ortalyǵynda burynǵy polıtseı qolynan kem degende 37 adam qaza tapty, olardyń kóbi balalar.

2020 jyly Nakhonratchasıma qalasynda áskerı qyzmetker 29 adamdy óltirip, ondaǵan adamdy jaraqattady.