Bangkok qalasynda Kaspıı teńiziniń ekologııalyq jaǵdaıy talqylandy
ASTANA. KAZINFORM — Jańa adamdar Bangkok qalasynda ótken SEA of Solutions 2026 halyqaralyq forýmynda Qazaqstan atynan qatysty. Forým Birikken Ulttar Uıymynyń Qorshaǵan orta jónindegi baǵdarlamasynyń (UNEP) jáne Shyǵys Azııa teńizderi jónindegi úılestirý organynyń (COBSEA) qatysýymen uıymdastyryldy.
Halyqaralyq alańǵa memlekettik organdardyń, ǵylymı qaýymdastyqtyń, halyqaralyq uıymdar men azamattyq qoǵamnyń ókilderi jınalyp, teńiz ortasyn qorǵaý máseleleri, sonyń ishinde Kaspıı teńiziniń ekologııalyq jaǵdaıy talqylandy.
Forýmda Jańa adamdar Kaspıı teńizin saqtaý máselesin kóterdi. Antitrash Azamattyq naýqanynyń belsendileri bul taqyrypqa birneshe ret nazar aýdaryp, túrli aktsııalar ótkizip, jaǵalaýdaǵy memleketterge úndeý joldap, teńizdi qorǵaýǵa baǵyttalǵan bastamalarǵa qatysty. Qazaqstan Prezıdenti Qasym-Jomart Toqaev bul máseleni halyqaralyq deńgeıde kóterip, ortaq kúsh-jigerdi biriktirý qajettigin atap ótken bolatyn.
- Kaspıı teńizi óńirimiz úshin ǵana emes, búkil álemniń energetıkalyq qaýipsizdigin qamtamasyz etý úshin asa mańyzdy mánge ıe. Qazaqstan Kaspıı barlyq óńir memleketteri men basqa elderdiń ıgiligi úshin beıbitshilik pen yntymaqtastyq keńistigi bolyp qalýy kerek dep nyq senedi. Sý resýrstary men ekologııa salasynda birlesken kúsh-jiger arqyly ony saqtaý asa mańyzdy, - dedi Prezıdent Qasym-Jomart Toqaev.
Bul úndeý Kaspıı teńizin saqtaýǵa qoǵam nazaryn aýdarý maqsatynda ázirlengen qazaqtyń dástúrli mádenıetine negizdelgen eki beıne arqyly tolyqtyryldy. Olardy tanystyrǵan belsendiler teńizdiń taǵdyry tek jaǵalaýdaǵy bes memlekettiń ǵana emes, jahandyq deńgeıde qoldaýdy qajet etetin ortaq másele ekenin atap ótti. Belsendiler dombyra men qobyzda qazaqtyń áıgili «Kóńil tolqyny» jáne «Erke sylqym» kúılerin oryndap, mýzykalyq óner arqyly basty úndeýdi jetkizdi: Save the Caspian Sea.
- Kúı arqyly biz halyqaralyq qaýymdastyqty Kaspıı teńizin saqtaý jolynda kúsh biriktirýge shaqyramyz. Búginde Qazaqstan Kaspııdiń tartylý máselesin úlken deńgeıde kóterip, naqty bastamalar usynady. Olardyń qatarynda sý resýrstaryn saqtaý jónindegi memleketaralyq baǵdarlama, birlesken ǵylymı jobalar jáne elder arasyndaǵy úılestirýdi kúsheıtý bar. Ekologııalyq sheshimderdiń saldary bir eldiń shekarasymen shektelmeıdi. Sondyqtan sheshimderdi birlesip izdeý mańyzdy, - dedi Jańa adamdar ókili Baýyrjan Amanov.
Aıta keteıik, Aqtaýda Kaspıı jaǵalaýyndaǵy zańsyz berilgen jerler memleketke qaıtaryldy.