Bangkok áýejaıynda 30 tasbaqany kıimine jasyryp ótpek bolǵan qyz ustaldy
ASTANA. KAZINFORM - Bangkoktaǵy Sývarnabhýmı halyqaralyq áýejaıynda keden qyzmetkerleri erekshe quqyqbuzýshylyqtyń jolyn kesti. Taıbeıge ushpaq bolǵan 19 jastaǵy Taıvan azamaty toqtatylyp, onyń kıiminiń astynan 30 tiri tasbaqa tabyldy, dep habarlaıdy BILD.
Bangkok Post basylymynyń jazýynsha, janýarlar kúdiktiniń denesine jabysqaq lentamen bekitilip, shaǵyn qapshyqtarǵa salynǵan. Osylaısha ol tasbaqalardy ádettegi júk tekserisinen jasyrmaq bolǵan. Dene skanerleri júk skanerlerindegideı anyq nátıje bermeıtini de esepke alynǵan.
Áńgime úndi juldyzdy tasbaqasy týraly bolyp otyr. Bul — sırek kezdesetin ári qatań qorǵalatyn túr. Azııa elderinde olar ekzotıkalyq úı janýary retinde suranysqa ıe, qara naryqta bireýiniń baǵasy júzdegen, keıde myńdaǵan eýroǵa deıin jetedi.
Mamandardyń aıtýynsha, mundaı jolmen tasymaldaý janýarlar úshin asa qaýipti. Olarǵa aýa men sý jetispeıdi, qozǵalý múmkindigi bolmaıdy. Sonyń saldarynan kóbisi tunshyǵyp, jaraqat alyp nemese kúızelisten ólip ketýi múmkin.
Ustalǵan qyzdyń Vetnam áýe kompanııasynda bortserik bolyp jumys isteıtini habarlandy. Taıland zańnamasyna sáıkes, qorǵalatyn janýarlardy zańsyz alyp júrý nemese elden shyǵarý 10 jylǵa deıin bas bostandyǵynan aıyrý jazasyna jáne bir mıllıon batqa deıin aıyppul salýǵa ákelýi múmkin.
Tárkilengen 30 tasbaqa mamandarǵa tapsyryldy.
Osyǵan deıin Qyrǵyzstan shekarasy arqyly 100 tasbaqany zańsyz alyp ótpek bolǵandardyń ustalǵany týraly jazdyq.
