Bananda kezdesetin jańa vırýstan 23 adam qaıtys boldy degen aqparat - feık
NUR-SULTAN. QazAqparat - Qaznet qoldanýshylary bir-birin Qytaıda Sınhýa aýrýhanasynda 23 adamnyń ólimine sebep bolǵan N7N90 jańa vırýsy týraly eskertip jatyr. Habarlamaǵa sáıkes, qorqynyshty aýrýdyń qozdyrǵyshy bananda bolady. Stopfake.kz málimetinshe, bul - Reseı men Ýkraınada jyl basynda taraǵan eski feık.
«Keshe túnde Sınhýa aýrýhanasynda n7n9 vırýsyn juqtyrǵan 23 adam qaıtys boldy. Eń egdesi 35-te, eń kishisi bir jasta bolǵan, olarmen baılanysta bolǵan dárigerler karantınge jatqyzyldy. Basty arnanyń jańalyqtarynda banandy, ásirese ońtústikten ákelingen banandy ýaqytsha almaýdy ótindi. Bul habarlamany ózińiz alańdaıtyn adamdarǵa, ásirese toptyq chattarǵa jiberińiz. Óz densaýlyǵyńyz úshin, taratyńyzdar, ótinish. Banan jeýdi azaıtyńyz! Birden jiberińiz, jaýap berýdiń qajeti joq, basqa adamdarǵa da ózderine qamqor bolýǵa kómektesińizder» delingen habarlamada.
Jyl basynda Reseı men Ýkraına qoldanýshylary osy mátindi bir-birine jibergen . Alaıda, bul habarlama rastalmady.
Sonymen qatar, N7N90 degen vırýs joq. Bul jerde qus tumaýy vırýsynyń shtammy jaıly aıtylǵan bolar – H7N9 . Ol aýa tamshy joldarymen beriledi.
Aýrýdyń qozdyrǵyshy jemisterdiń ishinde ómir súre alatyndyǵy jáne olar arqyly beriletini týraly málimetter joq.
Qus tumaýynyń oshaqtary 2013 jyly Nıderland, Italııa, Kanada, Amerıka Qurama Shtattary, Meksıka jáne Ulybrıtanııada tirkeldi.
Kóp jaǵdaıda ınfektsııa úı qustarynan tabylǵan.
Nıderlandta bir adam qaıtys boldy, basqa jaǵdaılarda aýrý konıýnktıvıt jáne joǵarǵy tynys joldarynyń jeńil belgileri túrinde ótken.
