Banan laqtyrǵan jankúıer endi fýtbolǵa barmaıdy - VIDEO
ASTANA. QazAqparat - Ótken demalys kúnderi ótken Ispan Prımerasynyń 35 týr oıynynda «Barselona» men «Vılıarreala» baq synasqan bolatyn. Osy kezdesý barysynda «Vılıarreala» jankúıeri syrt alańda óner kórsetip jatqan katalondyq fýtbolshy Danı Alveske banan laqtyryp, buzaqylyq qylǵan edi. Bul áreketi álemde úlken narazylyq týdyryp, «sary fleshmob» atalǵan qozǵalys keń taralǵany málim. Ispandyq El Pais gazeti habarlaǵandaı, búginde «El Madrıgal» stadıonynyń qaýipsizdik qyzmetkerleri buzaqy jankúıerdiń kim ekeni anyqtady.
Buzaqy jankúıer bul áreketi úshin endi ómir boıy súıikti komandasynyń óz alańynda bolatyn kezdesýlerine barmaıtyn bolady. Onymen qosa, ol qomaqty aıyppul tóleýmen qatar, eldiń barlyq sport arenalaryna bas suǵa almaı qalýy múmkin.
Jankúıer ózine taǵylǵan aıypty moıyndap, isine ókinetinin aıtyp, eshbir násildi, ultty kemsitpeıtinin jetkizipti.
Esterińizge sala keteıik, Barselona fýtbolshysy jankúıerdiń áreketine abdyramastan, jerden banandy alyp, jep qoıǵan bolatyn. «Sary fleshmob» qozǵalysyna qatysýshylar da banan jep nemese bananmen sýretke túsip, ınternet jelilerine taratqan. Olar osylaısha Danı Alvesti qoldaıtyndaryn jetkizgen edi.
