Banan, fıkýs, apelsın- Astanadaǵy botanıkalyq baqta ne ósedi
ASTANA. QazAqparat - Bir aı buryn Astanadaǵy botanıkalyq baq ashylyp, qala turǵyndarynyń serýendeıtin súıikti demalys ornyna aınaldy. Bul baqtyń aýmaǵy saıabaq aımaǵy jáne botanıkalyq aımaq aımaǵy bolyp ekige bólinedi. Aty aıtyp turǵandaı, botanıkalyq aımaqta oranjereıalar bar. Klımatrondar ázirge kelýshiler úshin ashylǵan joq, dep jazady Elorda Info.
Botanıkalyq baqtyń jylyjaılary sońǵy úlgidegi zamanaýı tehnologııalarmen jabdyqtalǵan. Astanalyq baqtyń oranjereıalaryna ornatylǵan júıeler TMD aýmaǵyndaǵy botanıkalyq baqtardyń birinde joq.
«Tamshylap sýarý, ylǵaldatqysh, klımat-baqylaý - bári kompıýtermen basqarylady. Keıbir belgili baqtarda ósimdikter áli kúnge deıin leıkamen sýarylady. Bizge Mınsk qalasyndaǵy 80 jylǵa jýyq tarıhy bar botanıkalyq baqta palmalardyń qalaı sýarylatynyn aıtyp berdi. Baqtyń jumysshysy ventılıatordy qosyp, shlangymen sýdy shashady. Qazirgi baqtarda qolmen isteıtin jumys kóp. Bul turǵydan alǵanda bizdiń baq óte damyǵan», - dedi BI Civil Construction kompanııasynyń dırektory Vıktor Bogma.
Ylǵaldyndyrý júıesi turaqty aýa temperatýrasy men ylǵalyn saqtap turady. Eger ǵımarattyń ishin salqyndatý kerek bolsa, tuman bolady. Ár ósimdikke tamshylap sýarý júıesi tartylǵan.
Ázirge ósimdikterdiń kútimimen birneshe maman aınalysyp jatyr. Onyń bireýi - Mınsk qalasynan shaqyrylǵan. Ol ósimdikterdiń aýrýynyń aldyn alýmen aınalysady.
«Bul ósimdikter Astanaǵa álemniń túkpir-túkpirinen ákelindi. Jetkizýshiler negizinen Ispanııa, Gollandııa men Germanııadan. Sebebi, Eýropada ol naryq jaqsy damyǵan. Ósimdikter ártúrli jylyjaıdan ákelindi ári qandaı da bir aýrý taratpasy úshin muqııat tekserildi. Olardy jetkizý kezinde eshqandaı qıyndyq bolǵan joq, tek palma aǵashyn ákelý qıynǵa soqty», - dedi Vıktor Bogma.
Botanıkalyq baqtyń oranjereıasynyń birine fıkýs, lımon, dratsen, apelsın, paportonık, palma jáne t.b. tropıkalyq memleketterden ákelingen 1100 ósimdik otyrǵyzyldy. Ekinshi klımatrondy 960 sýkkýlent «ıelendi». Olardyń arasynda álemde sırek kezdesetin kollektsııalyq kaktýstar men gıbrıdter bar.
Syrttan kelgen bul ósimdikterdiń ósip, burshaq jarýy úshin birneshe jyl kerek. Mamandardyń aıtýynsha, keıbir ósimdik bir jylda - 2 sm, al endi biri ári ketse - 10 sm ǵana ósýi múmkin.
«Ázirge astanalyq baqtyń oranjareıasy qaptaǵan kóbelekteri nemese erekshe qustarymen maqtana almaıdy. Alaıda, ol ýaqyttyń enshisindegi nárse»,- deıdi mamandar.
Botanıkalyq baq tek turǵyndar serýendep demalatyn jer ǵana emes, bolashaqta selektsııalyq jumystar júrgiziletin zertteý ortalyǵyna aınalady.
