Bambýk, kúnbaǵys, baobab: Álemdegi eń ǵajaıyp shyrshalar
ALMATY. QazAqparat - Almatyda belgili fotograf-jıhankez Igor Petrakov «Elkı-palkı» vernısajynda álemdegi eń erekshe jańajyldyq shyrshalardy kórsetti, dep habarlaıdy QazAqparat tilshisi.
Avtor ózi saparlaǵan elderdegi eń erekshe shyrshalardy sýretke túsirip júrgen. Fotograf bul qyzyǵýshylyǵyn 4 jyl buryn Vetnamdaǵy kúnbaǵys gúlin sýretke túsirýden bastaǵan.
Jańa jylda shyrshany árleý dástúri Germanııa elinen kelgen. Bul dástúr hrıstıan dininiń aldynda paıda bolǵan.
Ásirese, erterekte Eýropa halqy qylqan japyraqty aǵashtardyń ushar basynda joıqyn kúsh baryna sengen. Ańyzdarǵa súıensek, eń alǵashqy shyrshany bezendirý Martın Lıýter zamanynda 1605 jyldary bastalǵan. Sol jyldary shyrshalardy adamdar almamen, jańǵaqtarmen árlegen.
Qazirgi zamanda jańa jyldyq shyrshalardyń túr-sıpaty áralýan. Máselen, Qytaıda jańa jyldyq shyrsha retinde - mandarın aǵashy, Egıpette - shynar, Úndistanda - injir, Japonııada - alhory aǵashy bezendiriledi. Vetnamda jańa jyldyq shyrsha retinde bambýkty árleıdi.
Afrıkada shyrsha óspeıtindikten, bul elderde baobab aǵashy ortaǵa qoıylady. Sýdan Koroldiginde jańa jyl sımvoly retinde jańǵaq aǵashy tanylǵan.
Ganada Jańa jylda adamdar palma japyraqtarynan úıler salady.
Al Nıkaragýa halqy jańa jylda kofe aǵashyn aınalady.
Balı aralynyń turǵyndary jańa jylda aǵash paıdalanbaıdy. Olar túrli munaralardy túrli-tústi boıaýlarmen boıaǵandy qup kóredi.
Al Fılıppınde turǵyndar jańa jyl kezinde tiri aǵashty múlde qoldanbaıdy. Bul elde jańajyldyq shyrshalar plastık pen symdardan jasalady. Meksıkandyqtar da palmalardy árlegendi unatady.
Al kýbalyqtar kaktýstardy túrli jyltyraqtarmen árleýge áýes.
Qytaılyq Fen-shýı pálsapasyna sensek, shyrsha aǵashy aqsha shaqyratyn aǵash túrine jatady. Sondyqtan, qarjylyq maqsatta Jańa jyl kirerde ár úıde shyrsha turǵany abzal. Ony ádemilep árlep úıdiń ońtústik shyǵysyna ornalastyrý kerek.
Bıyl almatylyqtar da jańa jyldyq shyrshany bezendirýge tyń ıdeıalaryn qosty. Kez kelgen ǵımaratta meıramnyń kelgeninen habar beretin qyzyqty ınstallıatsııalar paıda bolǵan.
Atap aıtqanda, bankterdiń birinde dollar shyrshasy paıda bolsa, Arasan monshasynda monsha shyrshasy paıda bolǵan.
Avtor: Albert Ahmetov
