Balyqshylardyń aldynda biz qaýqarsyzbyz - TJD
TALDYQORǴAN. QazAqparat - Almaty oblysynda sońǵy kezde kólikterdiń sýǵa batýy jıilep ketti. Ótken jyly mundaı úsh jaǵdaı ǵana tirkelse, bıyl 5 kólik sýǵa batyp ketken, dep habarlaıdy QazAqparat tilshisi.
Oblystyq TJD Jedel qutqarý jasaǵynyń basshysy Saılaýbek Sharapıevtiń aıtýynsha, qutqarýshylar tek úgit-nasıhat jumystaryn júrgizgeni bolmasa balyqshylarǵa eshqandaı shekteý qoıa almaıdy.
«Ókinishke oraı biz balyqshylarǵa eshqandaı shekteý qoıa almaımyz. Tek olarmen túsindirý, úgit-nasıhat jumystaryn júrgizemiz. Áýesqoı balyqshylar qalaǵan jerlerine shyǵyp, muzdan oıyqtardy oıyp, balyq aýlaýmen aınalysady. Bizdiń jumysymyz olardy aralap, qaýipsizdik sharalaryn saqtaýǵa shaqyrý. Al múldem tyıym salýǵa quzyretimiz joq», dedi S.Sharapıev.
Sondaı-aq jedel qutqarý jasaǵynyń basshysy opyrylǵan muzdyń ortasyna túsken kólikterdi sýdan shyǵarý qıynǵa túsetinin aıtty. Tipti 200-300 metr jerge deıin muzdardy oıyp, jaǵalaýdan temir arqan tartyp shyǵarýǵa týra keledi eken. Alaıda qutqarýshylardyń basty mindeti adamnyń qaýipsizdigi bolyp sanalady. Sondyqtan muzǵa batqan kólikti sýdan shyǵarý tótenshelikterdiń mindeti emes. Biraq yńǵaıy kelip, muz qalyń bolǵan jaǵdaıda kólikterdi sýdan alyp shyǵýǵa kómektesemiz, deıdi olar.
Esterińizge sala keteıik, senbi kúni Qapshaǵaıda taǵy da muz opyrylyp, kólik batyp ketti. Jaǵalaýdan 300 metr jerde sýǵa batqan kólikte zardap shekkender joq.
