Balyqshylar Zaısan kólindegi qalyń qamys arasynda adasyp qaldy
ÓSKEMEN. QazAqparat – Shyǵys Qazaqstan oblysynyń tártip saqshylary Zaısan kólindegi qalyń qamys arasynda adasyp ketken balyqshylardy qutqardy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetinshe, keshe «102» nómirine Zaısan kóliniń jaǵasynda balyqshylardyń jaǵalaýǵa shyǵa almaı júrgendigi jaıly habar túsken. Anyqtalǵandaı, balyq aýlaýǵa shyqqan azamattar jaǵalaýdan tym alysqa ketip qalǵan. Qalyń qamys arasynda adasqan olar ózdiginen jol taba almaǵan.
«Kúrshim aýdandyq polıtsııa bóliminiń qyzmetkerleri birden qutqarý jumystaryn bastady. Jergilikti ınspektor qaıyqtyń qaı jerde ekenin tapty. Ol uıaly telefon arqyly balyqshylarmen baılanysqa shyǵyp, baǵyt berip, jol siltedi», - deıdi ShQO PD bastyǵy Saǵat Mádıev.
Osylaısha, tártip saqshylary balyqshylarǵa jaǵaǵa aman-esen jetýge kómektesti.
«Qaıyqqa otyryp, balyq aýlap júr edik. Qyzyǵyna kirip ketkenimiz sonsha, qarańǵy túskenin baıqamaı, tym alysqa ketip qalyppyz. Adasqanymyzdy sezgende dereý polıtsııa men qutqarýshylarǵa habarlastyq. Bizge der kezinde kómekke kelgen polıtseılerge myń alǵys», - deıdi balyqshylardyń biri Erbol Aýyzbaev.
