Balyqshylar tótenshe jaǵdaılar qyzmetiniń kómegi arqasynda aman qaldy
ASTANA. Qańtardyń 21-i. QazAqparat /Aıdar Ospanalıev/ - Tótenshe jaǵdaılar salasynyń qyzmetkerleri jyl basynan beri balyq aýlaýǵa shyqqan birneshe balyqshyny ajaldan alyp qaldy.
Bul týraly búgin jýrnalıstermen bolǵan brıfıngte Tótenshe jaǵdaılar mınıstrliginiń Baspasóz qyzmeti basqarmasynyń aǵa ınjeneri Lıýbov Shaposhnıkova málim etti, dep habarlaıdy QazAqparat.
Onyń málimetteri boıynsha, qańtardyń 8-i kúni Tótenshe jaǵdaılar mınıstrliginiń «Qazavıaqutqarý» respýblıkalyq memlekettik kásipornynyń qyzmetkerleri Mı-171 tik ushaǵymen Balqash kóli mańynda ornalasqan Prıozersk qalasynyń balyq aýlaýǵa shyǵyp, joǵalyp ketken 6 balyqshysyn qutqardy. Al qańtardyń 12s-i kúni Balqash kóline balyq aýlaýǵa shyǵyp, jarylǵan muzdyń saldarynan sýǵa qulaǵan 7 balyqshynyń 5-ýi qutqaryldy. Al eki balyqshy sýǵa batyp mert boldy. «Sondaı-aq qańtardyń 13-i kúni Alakól kóline balyqqa shyqqan áýesqoı balyqshylar muz jarylyp, jaǵaǵa jete almaı qalǵan. Olar da qutqarýshylardyń kómegimen aman qaldy», dedi baspasóz basqarmasynyń ókili.
