Balyq sharýashylyǵyndaǵy shekteýler men tyıym salýlardy retteıtin normatıvtik quqyqtyq akti ýaqytyly qabyldansa ıgi - S. Eńsegenov
ASTANA. 28 jeltoqsan. QazAqparat /Qanat Mámetqazyuly/ - Balyq sharýashylyǵyndaǵy resýrstardy paıdalanýǵa shekteýler men tyıym salýlardy retteıtin tıisti normatıvtik quqyqtyq akti ýaqytyly qabyldansa ıgi. Búgin QR Parlamenti Senatynyń jalpy otyrysynda osy máseleni kótergen senator Sársenbaı Eńsegenov Úkimet basshysynyń atyna saýal joldady.
Depýtattyń pikirinshe, elimiz úshin balyq sharýashylyǵyn damytý asa mańyzdy bolsa, sonyń ishinde, dástúrli túrde balyq aýlaý jáne óńdeýmen aınalysatyn negizgi óńirdiń biri Atyraý oblysy bolyp tabylady. Bul rette bıylǵy jyldyń kókteminde kásipshilik balyq aýlaýdy toqtatý boıynsha qalyptasqan jaǵdaı balyqshylardyń, balyq sharýashylyǵymen aınalysatyn eldi-mekender turǵyndarynyń áleýmettik-ekonomıkalyq jaǵdaıyna aıtarlyqtaı áserin tıgizgen.
«Áleýmettik jáne ekonomıkalyq turǵydan balyq aýlaýdyń mańyzdylyǵyn ekenin eskere otyryp, birqatar depýtattar mıgratsııa maýsymynda balyqtardyń jıi kezdesetin túrlerin aýlaýǵa quqyqtyq negiz berý jáne zańnamalyq turǵyda retteý úshin «Janýarlar dúnıesin qorǵaý, ósimin molaıtý jáne paıdalaný týraly» QR Zańynyń keıbir baptaryna ózgerister men tolyqtyrýlar engizý boıynsha usynystarǵa bastamashy boldy. Atap aıtqanda, atalǵan Zańǵa tolyqtyrýlar engizilip, oǵan sáıkes el Úkimeti tıisti ǵylymı uıymdar bergen, memlekettik ekologııalyq saraptamadan ótkizilýge tıis bıologııalyq negizdemege súıene otyryp janýarlar dúnıesin, olardyń bólikteri men derıvattaryn paıdalanýǵa shekteý men tyıym salýdy engizý, olardy paıdalaný oryndary men merzimderin belgileý týraly sheshim qabyldaıdy. Alaıda, atalǵan normatıvtik quqyqtyq aktilerdiń qabyldanýy keshigýde», - deıdi Sársenbaı Eńsegenov.
Osyǵan oraı, senator aldaǵy jyly respýblıkanyń balyq sharýashylyǵy sý aıdyndarynda kóktemgi balyq aýlaý maýsymynyń toqtaýyna jol bermeý kerektigin alǵa tartady. «Bul úshin balyq sharýashylyǵy sýbektilerine kóktemde balyq aýlaýǵa múmkindik beretin balyq resýrstaryn paıdalanýǵa shekteýler men tyıym salýlardy retteıtin tıisti normatıvtik quqyqtyq aktini qabyldaýdy tezdetý qajet», - deıdi ol.
