Balyq sharýashylyǵyn damytýǵa memlekettik qoldaý sharalary jetkiliksiz – mınıstr
«Júrgizilgen taldaýǵa sáıkes, 2019 jyldyń qorytyndysy boıynsha balyq azyǵyna 407 mln teńge sýbsıdııa bólindi. Sýbsıdııalaýdyń jalpy kóleminiń 81,5% nemese 332 mln teńgesi Túrkistan oblysyna tıesili. Bul aımaq balyq óndirý boıynsha kóshbasshy bolyp tur. Basqasha aıtqanda, bul balyq salasyn damytýǵa bólinetin sýbsıdııalaý kólemine tikeleı táýeldi ekenin bildiredi», - dedi Maǵzum Myrzaǵalıev.
Mınıstr balyq ósirýdi sýbsıdııalaý úshin óńirlerge transfert kólemin ulǵaıtýdy surady.
«Biz qoldanystaǵy memlekettik qoldaý sharalaryn qosymsha sýbsıdııalaýmen keńeıtý máselesin pysyqtadyq.
Birinshi, sýbsıdııalaýdyń jańa túrlerin engizý máselesi. Ekinshi, tor ishinde balyq ósirý sharýashylyǵyn, sýmen qamtamasyz etýdiń tuıyq tsıkli bar balyq ósirý sharýashylyǵyn, sondaı-aq qaıta óńdeý jónindegi keshenderdi qurýǵa jáne keńeıtýge jumsalǵan shyǵyndardy óteý máselesi. Aýyl sharýashylyǵy mınıstrligi men oblys ákimdikteri bul usynystardy qoldady», - deıdi ol.
Osy máseleler bir jolǵa qoıylsa, ósirilgen balyq kólemin 600 myń tonnaǵa deıin arttyrýǵa, eksport kólemin 10 esege ulǵaıtýǵa, shamamen 500 mlrd teńge kóleminde jeke ınvestıtsııalar tartýǵa balyq sharýashylyǵynyń áleýeti jetkilikti.
«Budan basqa, shamamen 100 myń qosymsha jumys ornyn qurýǵa jáne kóbine aýyldyq jerlerde halyq tabysyn arttyrýǵa yqpal etedi», - deıdi mınıstr.
Eske sala ketsek, QR Ekologııa, geologııa jáne tabıǵı resýrstar mınıstri Maǵzum Myrzaǵalıev búgin Úkimet otyrysynda balyq sharýashylyǵyn damytýǵa kedergi 3 problemany atady. Olardyń alǵashqysynyń sheshimi retinde sý qoımalaryn balyq aýlaýdan balyq ósirýge beıimdeýdi usyndy. Ekinshi túıitkildi sheshý úshin «Akvaósirý týraly» Zań qabyldaý qajettigin aıtty. Mınıstr atap ótken úshinshi másele – salaǵa memlekettik qoldaýdyń jetkiliksizdigi.
