Balyq sharýashylyǵyn damytý úshin qoldanystaǵy zańnamany jetildirý qajet

Búgin Parlament Senatynyń jalpy otyrysynda Úkimet basshysynyń atyna saýal joldaǵan senator Ǵarıfolla Esim osylaı málim etti.

«Balyq sharýashylyǵynda qalyptasqan jaǵdaıdy saralap, ekonomıkanyń osy salasyna Úkimet tarapynan jan-jaqty qoldaý kórsetýdiń mańyzy erekshe. Óıtkeni, qazirgi ýaqytta balyq sharýashylyǵynyń áleýeti tolyqtaı ıgerilmeı jatyr. Buǵan qosa, qoldanystaǵy keıbir zańnamalyq aktilerdiń arasyndaǵy qarama-qaıshylyq túsinisizdikke uryndyryp, balyq sharýashylyǵynyń damýyna keri áserin tıgizýde», - deıdi senator Ǵ. Esim. Onyń aıtýynsha, bul sala negizinen «Janýarlar dúnıesin qorǵaý, ósimin molaıtý jáne paıdalaný týraly» zańymen retteledi. Osy zań aıasyndaǵy qaýlyǵa sáıkes, Jaıyq-Kaspıı balyq sharýashylyǵy basseıni boıynsha jekelegen oryndar men ýchaskeler úshin 1 mamyrdan bastap balyq aýlaýǵa tyıym salynǵan.

«Bul shekteýdi engizý kezinde Kaspıı teńizi men Qıǵash ózenderiniń transshekaralyq jaǵdaıy eskerilmegen. Sondyqtan, bul shekteý arqyly balyq qoryn saqtaýǵa jáne kóbeıtýge baǵyttalǵan túpki maqsatqa jetý múmkin emes. Sebebi atalǵan sý aıdyndarynan Qazaqstannan basqa Reseı Federatsııasy da balyq aýlaıdy. Al, olardyń balyq aýlaý merzimi erte bastalyp, mamyr aıynyń 25-ne deıin, ıaǵnı bir aıǵa jýyq kesh aıaqtalady. Bul, óz kezeginde, bizdiń otandyq kásiporyndar úshin tıimsiz. Qıǵash ózeninen aýlanatyn balyqtyń 80 paıyzy kóktemgi balyq aýlaý maýsymyna keledi. Reseı balyqshylarymen salystyrǵanda balyq aýlaý merzimi shekteýli bolǵandyqtan, olar teńsiz básekelestik jaǵdaıynda qalyp otyr. Mundaı jaǵdaı ónimniń ózindik qunyna da, ata kásibi balyq sharýashylyǵymen baılanysty myńdaǵan adamdardyń turmys tirshiligine de keri áserin tıgizetini sózsiz», - deı kele depýtat Ǵarıfolla Esim atalǵan qaýlyǵa tıisti ózgerister engizip, jergilikti balyq kásiporyndarynyń tolyqqandy jumys jasaýyna múkindik týǵyzý qajettigin alǵa tartty.

Senatordyń aıtýyna qaraǵanda, balyqshylar úshin aýlanǵan balyqtardy óńdeý oryndaryna jetkizý, ony syrtqy naryqqa shyǵarý máseleleri de retteýdi asa qajet etedi