Balyq sharýashylyǵymen aınalysqysy keletinderge memleketten qoldaý kórsetiledi

TALDYQORǴAN. QazAqparat - Elimizde balyq sharýashylyǵymen aınalysýǵa qyzyǵýshylyq tanytqandarǵa memleketten qoldaý kórsetilýde, - dep habarlaıdy QazAqparat tilshisi.

Atap ketetin bolsaq, búgingi tańda bekire tuqymdas, tuqy jáne bahtah balyqtaryn ósirýge jem satyp alýǵa jumsalǵan qarajat kóleminiń 30% memleket sýbsıdııalaýda.

Odan basqa, aýmaǵy 50 gektardan asatyn sý aıdyndarynda taýarly balyq ósirýmen aınalysatyn kásipshilik sýbektilerine qural-jabdyqtardy satyp alýǵa ketken shyǵyndaryn 25% memleket sýbsıdııa retinde qaıtaryp beredi.

Aldaǵy ýaqytta memleket tarapynan jyly sýda mekendeıtin balyq túrlerin, shaıan tárizdilerdi ósirýge satyp alynǵan jemniń qarajatyn 30% qaıtarý, al balyq shabaqtaryn, balyqtardyń atalyq-analyqtaryn kútýge, dárilik preparattar jáne bıologııalyq negizdemeler ázirleýge jumsalǵan qarajattardyń 50% deıin sýbsıdııalaý boıynsha qoldanystaǵy zańnamaǵa ózgerister engizilip jatyr.

Búgin osy jáne ózge de aýqymdy josparlar men atqarylyp jatqan jumystar Qapshaǵaıda ótken jıynda talqylandy. Arnaıy shtab otyrysynda sala mamandary keshendi jospar quryp, sý aıdyndarynda ınspektorlar sanyn arttyryp, zańbuzýshylarǵa qatań sharalar qoldaný máselesin talqylady. Jıynǵa QR Ekologııa, geologııa jáne tabıǵı resýrstar mınıstrligi Balyq sharýashylyǵy komıteti tóraǵasynyń orynbasary Aıan Bahııanov qatysty.

Esterińizge sala keteıik, Qazaqstan Respýblıkasy Úkimetiniń qaýlysymen 2021-2030 jyldar aralyǵyna Balyq sharýashylyǵyn damytý baǵdarlamasy qabyldanǵan bolatyn. Atalǵan baǵdarlama sheńberinde oblys ákimdigimen Almaty oblysy boıynsha 2021-2030 jyldar aralyǵyna Óńirlik balyq sharýashylyǵyn damytý baǵdarlamasy qabyldandy.

Baǵdarlamalarǵa sáıkes, 2030 jylǵa deıin respýblıka boıynsha 270 myń tonna balyq ósirý josparlanýda.