Balyq sharýashylyǵy «jasyl ekonomıka» sheńberinde damıtyn bolady - N. Qapparov
ASTANA. 21 qarasha. QazAqparat - Balyq sharýashylyǵy «jasyl ekonomıka» sheńberinde damıtyn bolady. Bul týraly búgin Parlament Senatynyń jalpy otyrysynda «2014-2016 jyldarǵa arnalǵan respýblıkalyq bıýdjet týraly» zań jobasyn talqylaý barysynda depýtattardyń suraǵyna jaýap bergen Qorshaǵan orta jáne sý resýrstary mınıstri Nurlan Qapparov málim etti.
«Qazaqstandaǵy balyq óndirisi qazir qıynshylyq kórip otyrǵany ras. Kóp jyldan beri problemalar qordalanyp ta qalǵan. Elbasynyń sheshimimen sý jáne balyq sharýashylyǵy, orman komıtetteri bizdiń mınıstrlikke kóshti. Mamyr aıynda biz «jasyl ekonomıkaǵa» kóshý tujyrymdamasyn qabyldadyq. Osy tujyrymdamanyń bir baǵyty balyq sharýashylyǵyna arnalady», - deıdi mınıstr N. Qapparov.
Onyń aıtýynsha, «jasyl ekonomıka» óndirisi boıynsha birqatar sheshimder qabyldanyp jatyr. «Onyń ishinde sý baǵdarlamasy, turmystyq qaldyqtardy ıgerý baǵdarlamalary qabyldanatyn bolady. Al kelesi jyly sý jáne orman sharýashylyǵyna qatysty baǵdarlamalar qabyldaý josparlanǵan. Buǵan qarajat ta bólingen. Balyq óndirisi de osy baǵdarlamalar aıasynda qamtylady jáne osy salany damytý jańa deńgeıde jandana túsedi», - dedi N. Qapparov.
Toqtala ketetin jaıt, talqylaý barysynda senator Sársenbaı Eńsegenov elimizdiń ekonomıkasynda ózindik orny bolýǵa tıis balyq sharýashylyǵy quldyrap bara jatqanyn aıtqan bolatyn. «Keńes dáýirinde úsh respýblıkada ǵana balyq mınıstrligi bolsa, sonyń biri Qazaqstan edi. Sońǵy kezderi ókinishke qaraı, atalmysh salaǵa memleket tarapynan durys qoldaýdyń bolmaýy saldarynan balyq sharýashylyǵy tolyqtaı toqyrady. Bir mınıstrlikten ekinshisine aýystyryp júrip biz osy saladaǵy kadrlardy da, basqa da múmkindikterdi de ýystan shyǵaryp aldyq», - dedi S. Eńsegenov. Onyń aıtýynsha, balyq sharýashylyǵyna arnaıy baǵdarlama daıyndaý týraly depýtattardyń usynysyn Úkimet bıýdjet jobasynda qoldamaǵan.
