Balyq sharýashylyǵy sý resýrstary men ekojúıelerdi jaqsartýǵa, ınvestıtsııa tartýǵa yqpal etedi - Úkimet saǵaty
ASTANA. 11 maýsym. QazAqparat - Balyq sharýashylyǵyn damytý sý resýrstary men ekojúıelerdiń jaı-kúıin jaqsartýǵa, sý sapasyna ınvestıtsııa tartýdy yntalandyrýǵa yqpal etetin bolady.
Búgin Májiliste ótken Úkimet saǵatynda Qorshaǵan ortany qorǵaý mınıstri Nurlan Qapparov osylaı málim etti.
Mınıstrdiń aıtýynsha, dúnıejúzinde balyq resýrstaryna suranys qarqyndy túrde ósip keledi. Máselen, álemdik aýqymmen alǵanda balyq túrlerin jasandy óndirý 1970 jyldan bastap 10 ese ósse, qazirgi kúni tabıǵı balyq aýlaýshylyqty qosa alǵanda barlyq balyq naryǵynyń 50 paıyzyna jaqyndaýda.
«Jalpy tabıǵı jaǵdaılarda ósirilgen ónimge suranys odan da joǵary. Sondyqtan da, balqash alabuǵasy nemese kaspıı bekiresi sekildi jergilikti qundy jáne balyqtyń sırek túrlerin brendke aınaldyrý baǵytynda saýatty saıasat júrgizsek, Qazaqstannyń osy turǵyda áleýeti arta túseri sózsiz. Onyń ústine bizde búgingi kúni ýyldyryq bıznesiniń áleýeti tolyǵymen paıdalanylmaı keledi», - deıdi Nurlan Qapparov. Onyń sózine qaraǵanda, elimizdiń balyq sharýashylyǵy qory shamamen 3 mln. gektardy quraıdy. Budan bólek, kólderdi, bógender men ózenderdi qosa alǵanda, taýarly balyqtardy ósirýge arnalǵan 60 myńnan astam gektar sý qoımasyn qamtıdy.
«Postkeńestik respýblıkalardyń ishinde Qazaqstan ishki sý qoımalarynyń aýdany boıynsha Reseıden keıingi oryndy alady. Endeshe eldegi balyq sharýashylyǵy men balyq aýlaý isin damytýdan naryǵymyzdyń áleýeti jylyna 1 mlrd. dollardan astam somany quraýy múmkin», - deıdi mınıstr.
