Balyq sharýashylyǵy: Shabaq ımportynan qutylýdyń joly qandaı

NUR-SULTAN. QazAqparat – Búrli shabaqtarǵa degen ımport táýeldiligine núkte qoıý úshin Qazaqstanda balyq pıtomnıkteri ashylady. Bul jaıly Úkimet otyrysynda Ekologııa, geologııa jáne tabıǵı resýrstar mınıstri Maǵzum Myrzaǵalıev tolyǵyraq aıtyp berdi, dep habarlaıdy QazAqparat tilshisi.

« Baǵdarlamany sátti júzege asyrý úshin balyq ósirý sharýashylyqtaryn sapaly shabaqtarmen qamtamasyz etý asa mańyzdy. Búgingi tańda elimizde 15 (4 memlekettik jáne 11 jeke) balyq pıtomnıgi bar. Olar tuqy tuqymdas balyq túrleriniń shabaqtaryn 12%-ǵa jáne bekire tuqymdas balyqtardyń shabaqtaryn 66%-ǵa qamtamasyz etedi. Al alabalyq, aq saqa jáne basqa da qundy balyq túrleriniń shabaqtary shetelden ımporttalady. Bul rette 10 jyl ishinde shabaqtarǵa degen qajettilik 2,5 mlrd danany quraıtynyn atap ótý kerek», - dedi Maǵzum Myrzaǵalıev Úkimet otyrysynda.

Osyǵan baılanysty shabaq ósirý salasynda ımportqa táýeldilikti tómendetý maqsatynda birqatar jumys júrgizilmek. Atap aıtqanda birinshiden, 4 balyq ósirý aımaǵy úshin selektsııalyq genetıkalyq ortalyqtardy qurý máselesi pysyqtalady (2022 j. – 2, 2024 j. - 3). Ekinshiden, 2022 jyly alabalyq jáne aq saqa balyqtary úshin 2 jańa pıtomnık salý kózdelgen.

Budan basqa, 4 memlekettik balyq pıtomnıginde memlekettik-jekeshelik áriptestik tetigin engizý josparlanýda. Bul is-sharalar modernızatsııalaýǵa, qýattylyqty ulǵaıtýǵa jáne balyq ósirý materıaldarynyń túrlerin dıversıfıkatsııalaýǵa baǵyttalǵan ósimin molaıtý keshenderin damytý maqsatynda iske asady.