Balyq resýrsyn qorǵaý: 1800-ge jýyq buzýshylyq anyqtaldy

NUR-SULTAN. QazAqparat – 2021 jyldyń basynan balyq resýrstaryn qorǵaý salasynda 1800-ge jýyq ákimshilik quqyq buzýshylyqty anyqtaldy. Bul týraly Ekologııa, geologııa jáne tabıǵı resýrstar mınıstrligi Balyq sharýashylyǵy komıtetiniń tóraǵasy Narıman Júnisov aıtty, dep habarlaıdy QazAqparat tilshisi.

«Baǵdarlamany iske asyrý jónindegi jumystarmen qatar, balyq resýrstarynyń tabıǵı popýlıatsııasyn saqtaý jáne ulǵaıtý boıynsha sharalar qabyldanyp jatyr. Atap aıtqanda, brakonerlikpen kúres, balyq aýlaýdy retteý jáne balyq resýrstaryn jasandy túrde kóbeıtý júzege asyrylýda. 2021 jyldyń basynan bastap memlekettik ınspektorlar 1800-ge jýyq ákimshilik quqyq buzýshylyqty anyqtap, 23,2 mln teńge aıyppul saldy», - dedi N. Júnisov Ortalyq kommýnıkatsııalar qyzmetinde.

Sonymen qatar ol kóktemgi kezeńde elimizdiń batys óńirinde bekire tuqymdas balyqtardyń ýyldyryq shashý kezeńinde qolaıly jaǵdaı jasaýǵa baǵyttalǵan jyl saıynǵy keń aýqymdy «Bekire» balyq qorǵaý aktsııasy ótkizilgenin eske saldy. Atalǵan aktsııa QR ІІM jáne QR UQK Shekara qyzmeti bólimshelerimen birlesip ótkiziledi. Qalǵan óńirlerde «Ýyldyryq shashý» balyq qorǵaý aktsııasy ótkizildi.

«2021 jyly «Bekire» aktsııasy barysynda ákimshilik jaýapkershilikke 862 adam tartylyp, 56 qylmystyq is qozǵaldy. Zań talaptaryn buzǵandarǵa 15,4 mln teńge aıyppul salyndy. Zańsyz aınalymnan 31,1 tonna balyq, 851 balyq aýlaý quraly, 68 júzý jabdyǵy jáne 21 kólik quraly tárkilendi. Keltirilgen zalal úshin 13 mln teńge somasyna talap-aryz joldandy», - dedi komıtet basshysy.

Onyń aıtýynsha, «Ýyldyryq shashý» balyq qorǵaý aktsııasy barysynda 683 ákimshilik hattama toltyrylyp, 11 mln teńgeden astam somaǵa aıyppul salyndy.