Balyq resýrstaryna qol suǵýdyń aldyn alý sharasy barysynda 56 qylmystyq is qozǵalyp, 50 tonna balyq tárkilendi
ASTANA. Maýsymnyń 2-si. QazAqparat /Aıdar Ospanalıev/ - Іshki ister mınıstrligi eldegi balyq resýrstaryna qol suǵýdyń aldyn alý maqsatynda sáýirdiń 10-y men maýsymnyń 1-i aralyǵynda Oral-Kaspıı basseıninde «Bekire» jedel-saýyqtyrý sharasyn júrgizdi,
dep habarlaıdy QazAqparat.
Mınıstrlik taratqan málimetter boıynsha, atalmysh sharany tártip saqshylary Ulttyq qaýipsizdik komıtetiniń Shekara qyzmetimen jáne Kedendik baqylaý komıteti jáne balyq qorǵaý salasynyń qyzmetkerlerimen birlesip júrgizgen. Sharaǵa 400 qyzmetker men 58 tehnıka, Atyraý, Mańǵystaý, Batys Qazaqstan oblystary Іshki ister departamentteriniń 8 júzý quraly, Atyraý qalasyna kóshirilgen ishki ákerdiń 32 qyzmetkeri tartylǵan. Shara barysynda basty nazar balyq pen balyq ónimderin satýdyń, saýdalaýdyń jáne osy maqsatta tasymaldaýdyń aldyn alýǵa baǵyttaldy.
Kaspıı teńiziniń soltústik bóligin baqylaý maqsatynda tikushaq tehnıkasy qoldanylǵan. Al mamyrdyń 13-i kúni reıd tobynyń jumysy barysynda 16 ázirbaıjandyq azamat mingen 2 keme ustaldy. Kemeni tekserý barysynda odan 2,2 tonna bekire tuqymdas balyqtar men 94 balyq aýlaýǵa arnalǵan quraldar tabyldy. Atalmysh áreket boıynsha qylmystyq is qozǵaldy.
Jalpy operatsııa barysynda tártip saqshylary zańsyz aınalymnan 50 tonna balyq tárkiledi. Onyń 4 tonnasy bekire tuqymdastar. Sondaı-aq 1 myń 363 balyq aýlaıtyn quraldar men 104 júzý quraly tabyldy. 56 qylmystyq is qozǵalyp, onyń 45-i sotqa joldandy. Ákimshilik jaýapqa 790 quqyqbuzýshy tartylyp, 3 mıllıonnan astam teńgege aıyp salyndy. Shara barysynda anyqtalǵan zań buzý áreketterinen kelgen shyǵyn 19,5 mıllıon teńgeni qurady.
