Balyq brakonerleriniń 80 paıyzǵa jýyǵy – jumyssyzdar

ASTANA. QazAqparat – Brakonerlikke baratyndardyń 80%-ǵa jýyǵy jumystyń joqtyǵynan zańsyz áreketke barady. Bul týraly ákimshilik polıtsııa komıteti tabıǵat qorǵaý polıtsııasy tobynyń erekshe tapsyrmalar jónindegi aǵa ınspektory Álisher Jarmaǵambetov málim etti, dep habarlaıdy QazAqparat tilshisi.

«Balyq brakonerligi boıynsha taldaý jasaldy. Basty sebep - azamattardyń ekologııalyq ádebiniń tómendigi. Azamattar ońaı aqsha tabý jolynda qorshaǵan ortaǵa qandaı zalal keletinin túsinbeıdi. Brakonerlikke ekinshi sebep - jumyssyzdyq. Qylmystyq jaýapqa tartylatyn brakonerlerdiń 80%-ǵa jýyǵy - jumyssyzdar. Sonymen qatar zańsyz balyq aýlaý áreketimen kúresý maqsatynda quzyrly organdarmen birlesken jumys júrgizilip jatyr. Sonyń biri - qylmystyq jáne ákimshilik jaýapkershilik týraly kodekske ózgerister engizý jaǵy pysyqtalyp jatyr», - dedi Álisher Jarmaǵambetov ortalyq kommýnıkatsııalar qyzmeti alańynda ótken baspasóz máslıhatynda.

Spıkerdiń málimetinshe, jyl basynan beri Atyraý, BQO jáne Mańǵystaý oblysynda júrgizilgen reıdte 70 qylmystyq quqyqbuzýshylyq tirkelgen.

«Atap aıtqanda, 13 zańsyz balyq aýlaý, 3 ańshylyq, 54 sırek kezdesetin jáne joıylýǵa jaqyn qalǵan ańdardy aýlaý faktisi anyqtaldy. Nátıjesinde 1 myńnan astam adam ákimshilik jaýapkershilikke tartyldy», - deıdi ol.