Balyq aýlaýǵa kvotalardy bólýge qatysty ózgerister boldy

NUR-SULTAN. QazAqparat – «Sý aıdynyn kóbirek balyqtandyrsań – kóbirek kvota alasyń» qaǵıdatyna kóshý bóliginde kvotalardy bólý erejesine ózgerister engizildi.

Bul týraly Ekologııa, geologııa jáne tabıǵı resýrstar mınıstrligi Balyq sharýashylyǵy komıtetiniń tóraǵasy Narıman Júnisov aıtty, dep habarlaıdy QazAqparat tilshisi.

Onyń aıtýynsha, balyq aýlaýdy retteý tetikterin jetildirý jáne balyqty zańsyz aýlaǵany úshin jaýapkershilikti kúsheıtý maqsatynda zań júzinde tıisti sharalar qabyldandy.

«Birinshiden, balyq resýrstaryn paıdalanǵany úshin jyldyqtyń ornyna toqsan saıynǵy tólem engizildi. Buǵan deıin bıznes ruqsat alǵanǵa deıin balyq aýlaý tólemderin tóledi, bul aıtarlyqtaı qarjylyq júkteme boldy jáne kóbinese nesıe qarajatyn alýǵa nemese olardy aınalym qarajatynan alýǵa májbúr etti. Osy ózgeristerdi eskere otyryp, bıyldyń naýryz aıynda janýarlar dúnıesin paıdalanýǵa ruqsat berý erejesi tıisti sáıkestendirýden ótkizildi», - dedi N. Júnisov Ortalyq kommýnıkatsııalar qyzmetinde.

Budan bólek, balyq sharýashylyǵy sý aıdyndaryn bekitip berý tetigi ózgertildi, ol aýktsıon ótkizýdi kózdeıdi.

«Sonymen qatar, «Sý aıdynyn kóbirek balyqtandyrsań – kóbirek kvota alasyń» qaǵıdatyna kóshý bóliginde kvotalardy bólý erejesine ózgerister engizildi. Endi balyq aýlaýǵa kvotalardy bólý kezinde bekitilgen sý aıdyndaryn paıdalanýshylardyń balyq jiberý kólemi eskeriletin bolady», - dedi komıtet basshysy.

Budan buryn habarlanǵandaı, balyq sharýashylyǵyn damytýdyń 2030 jylǵa deıingi baǵdarlamasy aıasynda balyq ósirý qaı deńgeıde artatyny aıtyldy.