Balyq aýlap otyryp muz astyna túsip ketken eki adam qutqaryldy
ALMATY OBLYSY. QazAqparat – Almaty oblysynda muz astyna túsip ketken eki balyqshy qutqaryldy, dep habarlaıdy QazAqparat.
Búgin Almaty oblysynyń tótenshe jaǵdaılar qyzmetine Qarasaı aýdanyndaǵy sý qoımasynda balyq aýlap otyrǵan eki adamnyń muz astyna túsip ketkeni týraly habar kelgen.
«Oqıǵa ornyna Qarasaı aýdanynyń qutqarýshylary, Qaskeleń qalasynyń órt sóndirýshileri, respýblıkalyq jedel qutqarý jasaǵynyń qyzmetkerleri, polıtseıler jáne dárigerler shuǵyl attandy. Mamandar 1988 jylǵy er adam men 1994 jyly týǵan áıeldi sýdan shyǵaryp, aman alyp qaldy», - dep málim etti TJD baspasóz qyzmeti.
Qutqarylǵan er men áıelge alǵashqy kómek kórsetildi, sodan keıin olar Qarasaı aýdandyq aýrýhanasyna jetkizildi.
Qazir Almaty oblysy aýmaǵynda kún jylynyp, óńirdegi barlyq sý qoımalarynyń betindegi muz erı bastaǵan.
«Oblystyq tótenshe jaǵdaılar departamenti azamattardy balyq aýlaý kezinde qaýipsizdik talaptaryn saqtap, barynsha abaı bolýǵa shaqyrady. Kún jylyda muz ústinde balyq aýlamaǵan jón, kóktemgi muz óte senimsiz», - deıdi qutqarýshylar.
