Balýan Sholaqtyń shóberesi Kókshetaýǵa keldi
KÓKShETAÝ. QazAqparat - Kókshetaýda «Alyp ónerpaz Balýan Sholaq» atty ǵylymı-praktıkalyq konferentsııa ótti. Oǵan ataqty palýannyń shóberesi Shaıdolla Sholaqov qatysty. Bul týraly QazAqparat tilshisi Aqmola oblysynyń dene shynyqtyrý jáne sport basqarmasynyń baspasóz hatshysy Mahabbat Bolshınaǵa silteme jasap habarlaıdy.
Basqarma taratqan aqparatqa qaraǵanda, ótken jyly ulttyq sport túrleri boıynsha Aqmola oblystyq balalar men jasóspirimderdiń sport mektebine Balýan Sholaqtyń esimi berilgen eken.
«Alyp ónerpaz Balýan Sholaq» atty ǵylymı-praktıkalyq konferentsııaǵa ádebıet pen óner salasynyń, qoǵam qaıratkerleri, sazgerler jáne BAQ ókilderi qatysty. Konferentsııada tarıhshy ǵalymdar qazaqtyń ataqty halyq ánshi-kompozıtory, aıtysker-aqyn, at ústi oıynynyń túrli tásilderin meńgergen erekshe ónerpaz, kúsh ónerin kórsetken sportshy, jaýyryny jerge tımegen palýannyń jetistikteri men ómirjolyndaǵy qyzyqty oqıǵalar týraly sóz qozǵady.
«Óz elimizdiń tarıhyn bilý, onyń ishinde uly tulǵalardyń esimin dáripteý barshamyzdyń paryzymyz. Ásirese, halqymyzdyń maqtanyshyna aınalǵan Balýan Sholaqtyń ánshilik-aqyndyq murasyn nasıhattaý, onyń sporttaǵy jetistikteri elimizdiń keleshek jastaryn tárbıeleýde mańyzy zor», - dep atap ótti Aqmola oblysynyń dene shynyqtyrý jáne sport basqarmasynyń basshysy Áset Búkibaev.
Aıta keteıik, Kókshetaýdyń irgesindegi Krasnoıar kentindegi Balýan Sholaq atyndaǵy sport mektebinde kókpar, aýdaryspaq, teńge alý jáne jamby atý sııaqty ulttyq sport túrlerinen el chempıonaty ótýde. Jarysqa elimizdiń ár óńirinen kelgen 200 jýyq sportshy qatysýda.
