Balýan Sholaqtyń rólin somdaý úshin Erkebulan Daıyrov 10 kg salmaq qosty
ALMATY. QazAqparat - Sháken Aımanov atyndaǵy Qazaqfılm kınostýdııasy aty ańyzǵa aınalǵan Balýan Sholaq týraly fılm túsirip jatyr. Túsirilim jumystary qazir Raıymbek aýdany Kegen aýylynda ótip jatyr, dep habarlaıdy QazAqparat tilshisi.
Balýan Sholaq esimi eń alǵash ret Qyzyljar jármeńkesinde tanylǵan. Dál osy sátti sýretteý úshin qazir aýylda tarıhı dekoratsııa jasalyp jatyr. Rejısser Nurgeldi Sadyǵulov osyndaı dekoratsııada fılmniń negizgi sahnasynyń túsirilimderin júrgizýde.
«Eger ol tek balýan bolsa, onda men sportqa negizdelgen ekshn fılm jasaıtyn edim. Ol tek halyq kompozıtory bolǵanynda, onda shyǵarmashylyqtyń adamy týraly lırıkalyq fılm túsirer edim. Alaıda Balýan Sholaq «segiz qyrly, bir syrly» tulǵa, boıyna túrli óner daryǵan adam bolǵandyqtan, fılmde onyń obrazyn kórsetý qıynǵa soǵary anyq. Dese de osy fılmdi kórermen aldyna usyný úshin barymyzdy salyp jatyrmyz» - dedi fılmniń rejısseri Nurgeldi Sadyǵulov.
Fılmniń qoıýshy-sýretshisi Erjan Súleımenovtyń aıtýynsha, dekoratsııa eki aıdyń ishinde turǵyzylǵan. Sýretshiler jármeńkeni arhıv materıaldary men sýretter negizinde jasap shyqqan. Basty keıipkerler - Balýan Sholaq, Ǵalııa, Balqadısha jáne Tatıananyń kıimderi kostıým jónindegi sýretshi Merýert Torybaevanyń eskızderi boıynsha tigilgen. Rekvızıtorlar toby kınoda qoldanylatyn árbir zatty tyńǵylyqty tańdaı bilgen.
Rejısser fılmniń bas keıipkeri - Balýan Sholaqtyń róline akterdi kóp izdegen. Kastıngke kásibı akterlermen qatar sportshylar da qatysqan. Olardyń bireýleriniń bet-álpeti, dene bitimi sáıkes kelmese, endigi bireýleriniń ańyz adamnyń obrazyna kirýde sheberlikteri jetispeı jatty. Kóp synaqtardan soń Balýan Sholaqtyń róline akter Erkebulan Daıyrov bekitilgen. Balýannyń obrazyna sáıkes kelýi úshin akter kúresten dáris alyp, on kılogramm salmaq qosqan.
«Osy rólge meni tańdaǵany úshin rejısserge alǵysym sheksiz. Ultymyzdyń maqtanyshyna aınalǵan Balýan Sholaqtaı tulǵanyń obrazyn jasaý - árkimge buıyra bermeıtin baq. Bul ról fızıkalyq jáne psıhologııalyq turǵydan qıynǵa soǵatynyn jasyrmaımyn. Alaıda, obrazdy alyp shyǵam dep senem. Dese de, men úshin eń qıyny - mahabbat sahnalary. Óıtkeni ondaı sahnalardy jasaýdan uıalam» - dedi Erkebulan Daıyrov.
Fılmge Erkebulan Daıyrovpen birge elimizdiń tanymal akteri Bolat Ábdilmanov pen jas aktrısa Janel Maqajan túsedi.
Esterińizge sala keteıik, kınostsenarıı jazýshy, dramatýrg Dýlat Isabekovtyń M.Áýezov atyndaǵy qazaq memlekettik akademııalyq drama teatrynda sahnalanǵan «Jaýjúrek» pesasynyń jelisi boıynsha jazylǵan.
Kegendegi túsirilimderden soń, túsirý toby Kókshetaý men Pavlodar qalalaryna attanady.
