Balýan Sholaqtyń naǵyz kúresker ekenin kórsetýge tyrystyq - Erkebulan Daıyrov
NUR-SULTAN. QazAqparat - Akter Erkebulan Daıyrov «Balýan Sholaq» fılminde kúresker tulǵany somdaýǵa qandaı daıyndyqpen kelgenin aıtyp berdi, dep habarlaıdy QazAqparat tilshisi.
«Jalpy aıtar bolsaq, bul kıno bizge ne úshin kerek? Kıno - ıdeologııalyq saıasattyń úlken bir qarýy, ulttyq rýhanııatty alty qurlyqqa pash etetin jaqsy qural. Bizdiń soǵan quqymyz bar. Jaǵdaıymyz da jetedi. Qudaı qalasa, biraz kúnnen keıin «Balýan Sholaq» fılmimen Alty Alash qaýyshatyn bolady. Rejısser Nurgeldi Sadyǵulov aıtyp ótkendeı, Balýan Sholaqty kóp jastar tanymaıdy. Tek astynda «KFS» satatyn Balýan Sholaq sport kesheni dep qana biledi. Al shyndyǵynda, bul batyr bireýdi boz kilemde jyqqanymen emes, eldiń namysyn, qazaq óneriniń júgin arqalap, atadan balaǵa mıras bolǵan úlken mýzykalyq qundylyq qaldyrǵan arda azamat ekenin biri bilse, biri bilmeıdi. Sondyqtan, Balýan Sholaq týraly tek sport nemese ónerdiń tóńireginde júrgen adamnyń bilýi shart emes. Buny jalpy halyq bilýi kerek», - deıdi akter.
Erkebulan Daıyrovtyń aıtýyna qaraǵanda, kastıngten ótkennen keıin oǵan «bir jylqyny bir óziń jeýiń kerek» degen talap qoıylǵan.
«Salmaq qosý kerek dedi. Ýaqyt óte qysqa - 2 aı ǵana qalǵan. Bir aıdyń ishinde 15 keli salmaq qostyq. Syrt kelbeti - faktýrany barynsha uqsatýǵa tyrystyq. Kúnde sportpen aınalysyp, arnaıy jattyqtyrýshydan sabaq aldyq. Osynyń bári ońaı dúnıe emes. Balýan Sholaqty halqymen qaýyshtyrý úshin qandaı akter bolsyn, barynsha tyrysar edi. Al qalǵan qıyndyqtar elge mańyzdy emes, ózime ǵana qatysty dúnıe. Taǵy da qosa keteıin: Balýan Sholaqtyń ómiriniń árbir sáti - tarıhqa toly. Kenen atamyzben kezdesip, biraz ánderin úıretip ketken. Onyń ózi 45 mınýttyq kıno bolar edi. Sondyqtan, bul kınoda róldi qoldan kelgenshe sátti alyp shyǵýǵa tyrystyq. Balýan Sholaq - istiń adamy. El basyna kún týǵanda etigimen sý keshken naǵyz er azamat. Sol sebepti, Balýan Sholaqtyń kúresker bolǵanyn barynsha kórsetýge tyrystyq», - deıdi akter.
Eske sala ketsek, buǵan deıin QazAqparat tilshisine fılm rejısseri Nurgeldi Sadyǵulov «Balýan Sholaq» fılmi qalaı túsirilgenin aıtyp bergen bolatyn. Fılminiń treılerin myna siltemeden kórýge bolady.
Foto: brod.kz
