Balýan Sholaqtyń 150 jyldyǵy keń kólemde toılansa ıgi
Saýal barysynda depýtat bıyl qazaqtyń halyq kompozıtory, dala tsırkiniń negizin qalaýshy, ulttyq at sportynyń túrli tásilin jańǵyrtýshy, ónerpaz, jaýyryny jerge tımegen alyp kúsh ıesi Balýan Sholaqtyń dúnıege kelgenine 150 jyl tolatynyna toqtaldy. Onyń aıtýynsha, Balýan Sholaq zamanynda qazaq án óneriniń tamasha oryndaýshysy, nasıhatshysy bola júrip, ózi de án shyǵaryp, qazaqtyń ánshilik ónerin órkendetýge úlken úles qosqan kompozıtor. Balýan Sholaqtyń 20-ǵa jýyq áni bolǵanymen, búgingi kúni olardyń halyq arasynda nasıhattalýy tómen. Aqyndyq qyry múlde zerttelmegen. Tipti, Balýan Sholaqtyń ómirbaıany jóninde de zertteýler áli kúnge deıin naqtylanbaǵan.
«Qazaq rýhanııaty ǵana emes, mádenıetiniń de qalyptasýynda zor orny bar tulǵanyń dúnıege kelgen jeri men qaıtys bolǵan jylyna qatysty ártúrli derekter aıtylady. Sondaı-aq, Balýan babamyzdyń óz ulty úshin jasaǵan kúreskerlik qaıratkerligin qazirgi urpaqtyń bile bermeıtini qynjyltady. Balýan Sholaqtyń ult-azattyq kóterilisindegi orny da anyqtalmaǵan. Ol týraly ultymyzdyń kórnekti jazýshysy Sábıt Muqanovtyń «Balýan Sholaq» povesinde jáne belgili jazýshy-dramatýrg Dýlat Isabekovtyń «Jaýjúrek» atty týyndysynda aıtylady. Degenmen, bul jetkiliksiz», - dedi Q. Jabaǵıev.
Osy oraıda, depýtat ult tarıhy úshin qymbat ári qaıtalanbas iri tulǵa Balýan Sholaqtyń ómirbaıanyn, shyǵarmashylyǵyn tolyq zerttep, laıyqty baǵasyn berý Elbasynyń Joldaýynda aıtylǵan jańa qazaqstandyq patrıotızmdi qalyptastyrý men damytýda úlken ról atqaratynyn atap ótti.
«Sondyqtan da, Balýan Sholaq Baımyrzaulynyń 150 jyldyǵyna oraı birqatar sharalardyń oryndalǵany ıgi bolar edi. Atap aıtqanda, Almaty qalasyndaǵy Balýan Sholaq atyndaǵy sport jáne mádenıet saraıynyń aldynda Balýan Sholaqtyń eskertkishin ornatý, Aqmola jáne Jambyl oblystarynda Balýan Sholaqtyń mereıtoıyna oraı is-sharalar ótkizý, Astana nemese Almaty qalalarynda Balýan Sholaqtyń ómiri men shyǵarmashylyǵyna arnalǵan ǵylymı-tájirıbelik konferentsııa uıymdastyrý, qaıratker tulǵa týraly kórkem jáne derekti fılm túsirip, respýblıkalyq telearnalarda kórsetý», - dedi depýtat Q. Jabaǵıev.
