«Balýan Sholaq» fılmi Úndistandaǵy eń bedeldi festıvalge qatysyp jatyr
NUR-SULTAN. QazAqparat - Rejısser Nurgeldi Sadyǵulovtyń «Balýan Sholaq» fılmi 20-28 qarasha aralyǵynda Goa shtatyndaǵy 50-shi Úndistan halyqaralyq kınofestıvaliniń «Álimdik panorama» baǵdarlamasyna qatysyp jatyr, dep habarlaıdy QazAqparat «Qazaqfılm» kınostýdııasyna silteme jasap.
Atalmysh kınotýyndyny QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ túsirgen.
Bıyl kóktemde ulttyq prokatqa shyqqan tarıhı kınolenta palýan, ánshi ári kompozıtor Balýan Sholaqtyń ómiri týraly baıandaıdy.
Úndistan halyqaralyq kınofestıvali 1952 jyldan beri jergilikti úkimettiń qoldaýymen ótkizilip keledi. Baıqaýdyń negizin qalaǵan Djavaharlal Nerý salǵan. Úndistandaǵy eń bedeldi jáne Azııadaǵy eń kóne kınofestıvaldiń maqsaty – álemdegi fılmderdi bir alańǵa jınap, kórermenderdi kıno óneriniń eń úzdik týyndylarymen tanystyrý.
Ár jyldary bul festıvalge Shakrýkh Han, Amıtabh Batchan, Shekhar Kapýr syndy basqa da aty ańyzǵa aınalǵan kınogerler qatysqan. Osy mádenı is-shara barysynda Ang Lıdiń «Pıdiń ómiri» jáne Jastın Chedvıktiń «Bostandyqqa barar uzaq jol» syndy álemdik kınematografta tanymal kınotýyndylar kórsetilgen.
Bıyl festıval óziniń 50 jyldyq mereıtoıyn atap ótedi. Álemniń kóptegen kıno juldyzdary qatysatyn bul baıqaýdyń baǵdarlamasy da qyzyqty bolady deıdi uıymdastyrýshylar. «Altyn Globýs» júldesiniń ıegeri, tanymal frantsýz aktrısasy Izabel ıÝpper festıvaldiń qurmetti qonaǵy bolmaq. Festıval barysynda aktrısaǵa kıno ónerine qosqan úlesi úshin júldesi tabystalatyn bolady.
