«Balýan Sholaq» fılmi Daǵystanda kórsetiledi
NUR-SULTAN. QazAqparat - Qazaqtyń halyq kompozıtory, at oıynynyń túrli tásilin meńgergen ónerpaz, kúsh ónerin kórsetken sportshys, jaýyryny jerge tımegen balýan Balýan Sholaq (Nurmaǵanbet Baımyrzauly) týraly fılm Daǵystanda kórsetiletin boldy, dep habarlaıdy QazAqparat tilshisi.
Qazaqstanda «Balýan Sholaq» fılmi 18 sáýirden bastap prokatqa shyǵady.
«Jalpy, Amerıka tarapymen kelissóz júrgizilip jatyr. Osy jaqynda belgili bolady. Biz olarǵa treılerdi jiberip edik, qatty unatyp otyr. Búgin bir-eki kúnde sýbtıtrmen fılmniń aǵylshynsha nusqasyn Amerıkaǵa jiberemiz. Sodan keıin jaýabyn aıtady. Sonymen birge, buıyrsa, 10 mamyrdan bastap fılm Daǵystannyń bes qalasynda kórsetiledi. Sonymen birge, fılmdi Belarýs, Ýkraına sekildi memleketterde kórsetýdi maqsat etip otyrmyz», - dedi Muhtar Áýezov atyndaǵy Qazaq memlekettik-akademııalyq drama teatrynyń dırektory Sábıt Ábdihalyqov OKQ-da ótken baspasóz máslıhatynda.
Óz kezeginde rejısser Nurgeldi Sadyǵulov atalmysh týyndy - Balýan Sholaq babamyz týraly tuńǵysh fılm ekenin sóz etti.
«Sondyqtan, osy fılmde Balýan Sholaq babamyzdyń beınesin barynsha, qolymyzdan kelgenshe shynaıy kórsetýge tyrystyq. Men derekti fılmderdiń rejısseri bolǵandyqtan, biraz jumystar jasadym. Stsenarıı avtory - jazýshy Dýlat Isabekov. Fılmniń stsenarııi M.Áýezov atyndaǵy teatrdyń «Jaý júrek» qoıylymynyń jelisimen jazylǵan. 1998 jyldan bastap Temirbek Júrgenov atyndaǵy Óner akademııasynda oqyp júrgen kezimnen Balýan Sholaqtyń ómirine qyzyǵýshylyq tanytqym keledi. Dýlat aǵamyzdyń pesalaryn kórip, Dýlat aǵanyń aldyna baryp, batasyn aldym. Ol kisi qoldady. Sol pesanyń jelisi boıynsha stsenarıı jasaldy», - deıdi rejısser.
Eske sala ketsek, buǵan deıin QazAqparat tilshisine fılm rejısseri Nurgeldi Sadyǵulov «Balýan Sholaq» fılmi qalaı túsirilgenin aıtyp bergen bolatyn. Fılminiń treılerin myna siltemeden kórýge bolady.
Foto: brod.kz
