Balýan Sholaq atyndaǵy sport saraıy qalalyq kommýnaldyq menshikke berildi
ALMATY. QazAqparat - Balýan Sholaq atyndaǵy sport saraıy qalanyń kommýnaldyq menshigine berildi. Bul týraly qalalyq qoǵamdyq keńestiń otyrysynda belgili boldy, dep habarlaıdy QazAqparat tilshisi.
Otyrysta qalalyq Týrızm jáne syrtqy baılanystar basqarmasynyń esebi tyńdaldy. Basqarma ókilderi týrıstik avtobýs baǵdarlaryn retteý týraly josparlarymen bólisti. «Bıyl Balýan Sholaq atyndaǵy sport kesheniniń bazasynda týrıstik hab ashýdy josparlap otyrmyz. Sizder biletinderińizdeı, ótken jyly qala terrıtorııasynda ornalasqan birqatar nysandy qalalyq ákimdiktiń balansyna qaıtarý kerektigi jaıly másele kóterilgen bolatyn. Nysandar standarttarǵa saı qaıta jóndeýden ótkizilip, qalpyna keltirý jumystary júrgiziletin bolady. Bul jumys abattandyrý nemese qalanyń tarıhı bóligin qalpyna keltirý baǵytynda jasalyp jatyr. Sondyqtan Balýan Sholaq atyndaǵy sport kesheni ákimdikke berildi. Qazir eskız syzylyp jatyr. Týroperatorlarmen de, kásipkerlermen de áńgime júrgizildi», - dedi basqarma basshysy Erlan Jaılaýbaı.
Kontseptsııa boıynsha sport saraıynan Almaty jáne Almaty oblysynyń kórnekti oryndaryn aralaýǵa týrıstik avtobýstar shyǵatyn bolady. Bul jerden Kólsaı, Qaıyńdy, Sharyn, Talǵar eldi mekenderine baǵyt ashylady. «Qazir ár týrfırma ár aımaqtan shyǵady. Bir júıege keltirý kerek. Sátpaev pen Abaı kóshesiniń ortasynda Baıtursynov kóshesiniń shyǵys jaǵynan qosymsha turaqtar jasalynady.,- dedi Erlan Jaılaýbaı.
Qalada týrıstik jaǵdaıdy jaqsartýǵa navıgatsııa, avtobýstardyń jumysy, úsh tildilik, aqparattandyrý júıesi ózgeretin bolady. Atap aıtqanda temir jol, avtovokzaldar, Abylaı han kóshesi men Gogol kóshesi qaıta jasalady.
Qoǵamdyq keńes músheleri «Saıran» avtovokzalynda týrısterdiń ekinshi núktesin ornalastyrý týraly bastama kóterdi. Sonymen qatar, qoǵamdyq keńes músheleri qos qabatty avtobýstar satyp alý týraly oı aıtty. Erlan Jaılaýbaı bul suraq qarastyrylatynyn jetkizdi.
Sondaı-aq, jaqynda «Qazaqfılm» alańynda etno-lend ashylatyny belgili boldy.
