Baltyq teńiziniń jaǵalaýyna kelgen sırek kezdesetin órkeshti kıt kóptiń nazaryn aýdardy
ASTANA. KAZINFORM — Baltyq teńiziniń jaǵalaýyndaǵy Vısmar shyǵanaǵynda qurylysshylar uzyndyǵy shamamen 8 metr bolatyn kıtti baıqap qalǵan. Janýardy baqylaý úshin sý polıtsııasy jiberildi. Bul týraly DW jazdy.
Mamandardyń boljamynsha, bul — órkeshti kıt (gorbatyı kıt) bolýy múmkin. Alaıda ázirge bul týraly naqty aıtýǵa erte. Sarapshylardyń paıymdaýynsha, bul jaqynda Shlezvıg-Golshteın jaǵalaýynda kóringen sol bir kıt bolýy yqtımal.
Shilde aıynyń ortasynda órkeshti kıt Kıl fordynyń mańynan baıqalǵan, al bir aptadan keıin ol Flensbýrg fordynyń aýmaǵynda kóringen.
Jergilikti Qorshaǵan orta mınıstrliginiń málimetinshe, jalpy alǵanda janýardyń jaǵdaıy jaqsy kórinedi: ol únemi sý betine shyǵyp, qaıtadan sýǵa súńgip júr.
Sonymen qatar sý polıtsııasynyń aıtýynsha, kıttiń terisiniń jaǵdaıy nasharlaǵan. Munyń bir sebebi Baltyq teńizindegi jaǵdaı bolýy múmkin, sebebi onyń sýy órkeshti kıtterdiń tirshiligine qajetti deńgeıde tuzdy emes.
Qalaı bolǵanda da, bul aımaq kıtterdiń mekendeıtin ádettegi ortasy emes. Sarapshylar bul jaǵdaı adamdardyń ony tabıǵı mekenine qaıtarýǵa tyrysqanyna qaramastan birneshe ret jaǵalaýǵa shyǵyp qalǵan Tımmı atty kıttiń oqıǵasyna uqsap ketýi múmkin ekenin boljaǵan.
Aıta keteıik, buǵan deıin Danııada «Tımmı» atty kıttiń denesi jaǵaǵa shyǵarylǵanyn jazdyq.
