Baltyq teńizindegi aral aýktsıonda 60 myń eýroǵa satyldy
ASTANA. KAZINFORM – Kezinde GDR-diń áskerı-teńiz bazasy retinde paıdalanylǵan Baltyq teńizindegi jasandy aral aýktsıonda 60 myń eýroǵa satyldy, dep habarlaıdy DW.
Jańa ıesi erekshe nysandy mádenı is-sharalar men úılený toılaryn ótkizýge arnalǵan alańǵa aınaldyrýdy josparlap otyr.
Saýda-sattyq Gambýrg qalasynda ótti. Aýktsıonǵa 1954 jyly 600 qazyqtyń ústine salynǵan, aýdany 250 sharshy metr bolatyn qaraýsyz qalǵan beton platforma shyǵarylǵan.
Aýktsıon uıymdastyrýshylarynyń aıtýynsha, nysanǵa qyzyǵýshylyq kútkennen de joǵary bolǵan. BAQ-ta jarııalanǵannan keıin áleýetti satyp alýshylardan kún saıyn júzdegen qońyraý túsken.
Araldyń bastapqy baǵasy 39 myń eýro bolǵan. Saýda-sattyqtyń 20 kezeńi nátıjesinde onyń quny 60 myń eýroǵa deıin kóterildi.
Aýktsıon jeńimpazy McCube kompanııasy boldy. Avstrııalyq kompanııa modýldik qurastyrmaly úıler shyǵarýǵa mamandanǵan.
Kompanııa basshysy Olıver Pezendorfer aralda mádenı jáne oıyn-saýyq keńistigin qurý múmkindigin qarastyryp jatqanyn jetkizdi. Sondaı-aq nysandy úılený toılaryn jáne basqa da saltanatty is-sharalardy ótkizý úshin paıdalaný josparlanǵan.
Buǵan deıin Qytaıdyń Shanhaı qalasynda álemdegi alǵashqy kez kelgen aýa raıynda tereń teńiz zertteýlerin júrgizýge arnalǵan júzbeli «jasandy aral» ǵylymı platformasy iske qosylǵany habarlanǵan edi.
Sondaı-aq Eıfel munarasynyń bir bóligi aýktsıonda 450 myń eýroǵa satyldy.
