Baltyq elderinde qatty daýyl soǵyp, júzdegen myń úı jaryqsyz qaldy
ASTANA. KAZINFORM — 22 jáne 23 tamyzda Latvııa, Lıtva, Estonııa, sondaı-aq Polsha men Belarýs aýmaǵynda «Prıska» atty qýatty tsıklon ótti. Jeldiń ekpini sekýndyna 30 metrden asty, dep habarlaıdy DW.
Lıtvanyń soltústik-shyǵysynda bir adam ústine aǵash qulap qaza tapty. Latvııanyń Elgava qalasynda taǵy bir adam ǵımarattyń qulaǵan bólikteriniń astynda qalyp, til tartpaı ketti. Kóptegen turǵyn qulaǵan aǵashtardan zardap shekti.
Latvııada 14 adam medıtsınalyq kómekke júgindi. Dárigerler olardyń arasynda aýyr jaraqat alǵandar bar ekenin habarlady. Adamdardyń kópshiligi aǵashtar men butaqtardyń qulaýynan, sonyń ishinde kólikterdiń ústine qulaǵan aǵashtardan zardap shekken. Keıbir turǵyndar kólikteriniń ishinde qamalyp qalǵan. Rıga áýejaıy reısterdiń keshigýi múmkin ekenin eskertti.
Daýyl elektrmen jabdyqtaý júıesinde aqaýlar týǵyzdy. Jergilikti BAQ málimetinshe, Latvııada 250 myńnan astam úı jaryqsyz qaldy. Lıtvada elektr qýaty 150 myńnan astam úıde óshse, Estonııada 3,5 myńǵa jýyq úı jaryqsyz qalǵan. Polshada 145 myńnan astam úıde elektr energııasy bolmaǵan. Al Belarýste 650-den astam eldi mekende elektr qýatymen baılanysty aqaýlar tirkeldi. Sonymen qatar Latvııada kóptegen uıaly baılanys abonentteri baılanysqa shyǵýda qıyndyqtarǵa tap boldy.
Qatty jaýyn-shashyn birneshe óńirde sý tasqynyna sebep bolyp, jol, temirjol jáne teńiz qatynasynyń jumysyna kedergi keltirdi. 23 tamyz kúni tústen keıin óńirde qatty jelge baılanysty eskertý saqtaldy.
Buǵan deıin Qytaı taıfýnǵa baılanysty «kók» deńgeıdegi daýyl týraly eskertý jarııalaǵany habarlanǵan.
