Baltamen mektepke kelgen: SQO-da oqýshyny qarýsyzdandyrǵan 2 jasóspirim marapattaldy

PETROPAVL. QazAqparat – Soltústik Qazaqstan oblysynda polıtseıler Petropavldaǵy № 4 orta mekteptiń eki oqýshysyn marapattady. Olar sabaqqa balta men pyshaq ákelip, balalardy jaraqattaǵan 9-synyp oqýshysyn qarýsyzdandyrǵan edi, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, № 4 qalalyq orta mekteptiń joǵary synybynda oqıtyn eki oqýshy Nurıslam Sandybaı men Aldııar Nurtaev, sondaı-aq olardyń analary oblystyq polıtsııa basshylyǵynyń atynan alǵys hatpen marapattaldy.
Erjúrek balalar men olardyń analary Aısulý Sandybaeva men Aıman Nurtaevaǵa marapatty SQO PD bastyǵynyń birinshi orynbasary Qanat Aıtbaev saltanatty túrde tabys etti.

Qanat Aıtbaev mundaı jaǵdaıda ár eresek adamnyń qolynan batyldyq kele bermeıtinin, alaıda Nurıslam men Aldııar birer sekýnd ishinde shuǵyl áreket etip, ózin jáne basqa balalardy qaýip-qaterden qorǵaǵanyn atap ótti.

Balalarǵa alǵys hatpen birge syılyqtar jáne voleıbol men basketbol doby syıǵa berildi. Óıtkeni bul jasóspirimder sporttyń osy túrimen shuǵyldanyp júr.
Aıta keteıik, bul bozbalalardyń alǵashqy marapaty emes. Buǵan deıin olar mektep jınalysynda alǵys aldy, sondaı-aq olardyń batyldyǵyn Qorǵanys mınıstrliginiń ókilderi atap ótti.

Esterińizge sala keteıik, bıylǵy 13 aqpan kúni tańerteń Petropavl mektebinde tótenshe jaǵdaı oryn aldy – 9-synyp oqýshysy mektepke pyshaq pen balta alyp kelip, úsh oqýshyǵa dene jaraqatyn saldy.
Zardap shekken balalar aýrýhanaǵa jatqyzyldy.
Polıtsııa men dárigerler kelgenge deıin mektepte oıran salǵan jasóspirimdi mekteptiń eki oqýshysy: Nurıslam men Aldııar ustap, qarýyn julyp aldy.
9-synyp oqýshysy eki aıǵa qamaýǵa alyndy.
Qazir osy qylmys faktisi boıynsha tergeýshiler istiń barlyq mán-jaılaryn jan-jaqty zertteýge baǵyttalǵan sotqa deıingi tergeý júrgizýde, onyń nátıjeleri boıynsha túpkilikti protsestik sheshim qabyldanatyn bolady.