Balkonnan shyqqan: Qaraǵandy oblysynda 1 jasar sábı 2-qabattan qulady
SARAN. QazAqparat - Qaraǵandy oblysynyń Saran qalasynda bir jasar bala úıge japsarlas salynǵan nysannyń shatyrynan qulap ketti, dep habarlaıdy QazAqparat tilshisi.
Málim bolǵandaı, sábı ekiqabatty turǵyn úıdiń ashyq turǵan balkonynan shyǵyp, úıdiń aldyna qosymsha salynǵan qurylystyń shatyryna túsken. Keıin tómenge qulap ketken.
«2 maýsymda Saran qalasynda úlkenderdiń qaraýynsyz qalǵan 2020 jyly týǵan qyz bala abaısyzda japsarlata salynǵan nysannyń tóbesinen qulap (bıiktigi 2,5 m), aýrýhanaǵa jetkizildi», - dedi Qaraǵandy oblystyq Tótenshe jaǵdaılar departamentiniń baspasóz qyzmetinen.
Qaraǵandy oblysynyń Densaýlyq saqtaý basqarmasy bala Maqajanov atyndaǵy klınıkaǵa jetkizilgenin, oǵan jabyq bas súıek-mı jaraqaty men bas mıynyń shaıqalýy dıagnozy qoıylǵanyn habarlady.
«Qyz balany neırohırýrg qarap shyqty. Aldyn ala dıagnoz: jabyq bas súıek-mı jaraqaty, bas mıynyń shaıqalýy. Qazir onyń jaǵdaıy qanaǵattanarlyq. Tekserý qorytyndysy boıynsha aldaǵy áreketter týraly sheshim qabyldanady», - dedi vedomstvonyń baspasóz qyzmetinen.
TJD qyzmetkerleriniń aıtýynsha, eresekter tarapynan tıisti qadaǵalaýdyń bolmaýy balalardyń jaraqattanýy men óliminiń negizgi sebebi bolyp otyr. Osyǵan baılanysty qutqarýshylar ata-analardan kishkentaı balalarǵa baqylaýdy kúsheıtýdi, olardy terezeleri ashyq úı-jaılarda jalǵyz qaldyrmaýdy suraıdy.
