Balkonnan qus atqan kókshetaýlyqqa aıyppul salyndy
KÓKShETAÝ. QazAqparat – Kókshetaýda balkonnan shaǵalaǵa oq atqan er adam jaýapqa tartyldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, Kókshetaý qalalyq PB qyzmetkerleri Instagram -da jarııalanǵan belgisiz er adamnyń turǵyn úı balkonynan birneshe ret oq atqany týraly rolıkti anyqtaǵan.
«Tekseris barysynda beınerolıktegi Kókshetaý qalasynyń 40 jastaǵy turǵyny ekeni anyqtaldy. Ol óziniń anasymen turady. Myltyq oǵan 15 jyl buryn qaıtys bolǵan ákesinen qalǵan», - deıdi vedomstvodan.
Anyqtalǵandaı, 13 qyrkúıekte er adam úıiniń balkonyna shyǵyp, úı aýlasyndaǵy qoqys jáshiginiń ústinen ushyp júrgen shaǵalaǵa myltyqtan oq atqan. Er adam qustardyń shýlaǵan daýysy uıqy bermegendikten osyndaı qadamǵa barǵanyn aıtyp aqtaldy.
«Osyǵan baılanysty er adamnyń Qylmystyq kodekstiń 436-babynyń 1-bóligi boıynsha ákimshilik quqyqbuzýshylyq jasaǵany anyqtalyp, 20 aılyq eseptik kórsetki kóleminde aıyppul salyndy. Sonymen birge, tártip saqshylary odan 4,5 mm kalıbrli «IJ-38» myltyǵy men 48 dana oqty tárkiledi», - dep tolyqtyrdy vedomstvodan.
