Balkonda otshashý atpaq bolǵan aqtóbelik aýrýhanaǵa tústi
AQTÓBE. QazAqparat - 30 jastaǵy aqtóbelik Jańa jyl merekesinde jansaqtaý bólimine tústi. Onyń qolynda otshashý jarylyp ketti, dep habarlaıdy QazAqparat tilshisi.
Aqtóbede mereke kúni jedel járdem qyzmetine júgingender az bolmady. 31 jeltoqsan kúni saǵat 18:00 men 1 qańtarda saǵat 8:00-ge deıin qala turǵyndarynan 400-den astam shaqyrý kelip tústi. Jedel járdem brıgadasy 383 jerge barsa, dıspetcherler 18 shaqyrtýǵa telefon arqyly keńes berdi. Kóbiniń qan qysymy, al balalardyń dene qyzýy kóterildi. Júregi aýyrǵan 6 adam shuǵyl jansaqtaý bólimine jetkizilip, jatqyzyldy. Jańa jyl túni túrli otshashýdan jaraqat alǵandar da tirkeldi. Dárigerler osyndaı oqıǵa bolǵan 15 jerge bardy.
«Saǵat túngi 12-den 21 mınýt ótkende otshashýdan zaqym alǵan adamǵa kómek suraldy. Jedel járdem shaqyrtýǵa 9 mınýtta jetti. 30 jastaǵy aqtóbelik balkonda otshashý atpaq bolǵan. Biraq úlgermeı, petard qolynda jarylyp ketken. Ol birden oblystyq jedel járdem aýrýhanasyna tústi. Jaǵdaıy aýyr. Onyń oń jaq qolynyń eti jyrtylyp, saýsaǵy zaqymdandy. Naýqas travmatıkalyq shok aldy», - dep habarlady Aqtóbe oblystyq densaýlyq saqtaý basqarmasynyń ókili.
