Balqashtyqtar kóldiń qyzyǵyn áli kóre almaı kele jatyr - Hamza Nókerbekov
ALMATY. 25 shilde. QazAqparat /Erlik Erjanuly/ - 70 myńǵa jýyq turǵyny bar Balqash qalasy týrızmniń paıdasyn kóre almaı otyr. Tazalanbaǵandyqtan qamys ósip ketken kól jaǵasynda sýǵa júzýshiler úshin de, ózge demalýshylar úshin de eshqandaı jaǵdaı jasalmaǵan. Sondyqtan turǵyndar demalys kezinde oblys aýmaǵyndaǵy demalys úılerine barýǵa tyrysady.
"Keńes dáýirinde kóldiń qalamen shektesip jatqan jerleri qamystan tazartylyp turatyn. Qazir bári qaraýsyz qaldy. Onda demalýshylar úshin eshqandaı jaǵdaı jasalmaǵan. Sondyqtan keıde bireýler Balqashtyń jaǵasynda turasyńdar, qandaı baqyttysyńdar degen kezde kirerge tesik tappaı uıalamyz. Óıtkeni ózge jerden keletin demalýshylar turmaq ózimizge qonaqqa kelgen jaqyn týys-týǵandy kól jaǵasyna aparýǵa uıalamyz. Múmkindigine qaraı qaladan syrtqa alyp shyǵyp, jekemenshik demalys úıleriniń birine aparýǵa májbúr bop júrmiz", - deıdi "Qazaqmys" kompanııasyna qarasty kásiporyndardyń birinde montajnık bolyp jumys jasaıtyn Hamza Nókerbekov.
Jazǵy demalys kezinde balalaryn jarty aqshasyn tólep ózi jumys jasaıtyn kásiporynnyń qaramaǵyndaǵy demalys úıine jiberýdi ádetke aınaldyrǵan otaǵasynyń aıtýynsha, bul barlyq balqashtyqtardyń basyndaǵy ortaq másele. Qonaqtarǵa qolaıly jaǵdaı jasalmaǵandyqtan Almatydan qatynaıtyn poezdar Balqashqa toqtamaıdy. Kóldiń atyn estip alystan at arytyp kelgender jol azabynan qashyp kelesi joly onda kelmeýge tyrysady. Qala ákiminiń orynbasary Mahmýt Jarylǵap - "kól jaǵasynda qalaǵa qaraıtyn demalys orny joq. Al qalanyń týrıstik ınfraqurylymdy damytý jospary osy ýaqytqa deıin nege júzege asyrylmaı otyrǵanyn aıta almaımyn Men bul qyzmetke jaqynda aýysyp kelgendikten odan habarsyzbyn", - degendi aıtyp otyr.
