Balqashty zertteý granty: Frantsııa 1,35 mln eýro qarjyny qashan bóledi

ASTANA. KAZINFORM — QR Sý resýrstary jáne ırrıgatsııa mınıstrligi Frantsııanyń damý agenttigi Balqashty zertteý úshin bóletin 1,35 mln eýrolyq grantqa qatysty jumys qalaı júrip jatqanyn málimdedi.

— QR Sý resýrstary jáne ırrıgatsııa mınıstrligi Frantsııanyń damý agenttigi (AFD) jáne Frantsııanyń geologııalyq jáne taý-ken zertteýler bıýrosy (BRGM) Balqash kólin saqtaý boıynsha birlesken jumys júrgizýge ýaǵdalasty. AFD Balqash kóliniń sý jınaý alańyn saqtaý boıynsha sheberlik josparyn ázirleýge grant qarastyrýda. Osy jumys aıasynda BRGM keshendi zertteýler júrgizedi jáne Balqash kóliniń sý resýrstaryn turaqty basqarý strategııasyn ázirleıdi. Zertteý ádisteri sý resýrstary men sýdy paıdalanýdyń aǵymdaǵy kúıin taldaý úshin spýtnıktik altımetrııa men gıdrologııalyq modelderdi paıdalanýdy, sondaı-aq klımattyń ózgerýi men adam áreketiniń áserin eskere otyryp, bolashaq ózgeristerdi modeldeýdi qamtıdy, — delingen Kazinform-nyń resmı saýalyna joldaǵan jaýapta.

Sondaı-aq mınıstrlik Qapshaǵaı sý qoımasynyń jumysyn ońtaılandyrý boıynsha usynystar ázirleý úshin Balqash kóline quıatyn jáne odan shyǵatyn sý aǵynyn modeldeý júrgiziletinin málimdedi.

— Osy joba sheńberinde master-jospar mazmunyn jasaý boıynsha jumystar bastaldy. Master-jospardy jasaý aıaqtalǵannan keıin Balqash kóliniń sý jınaý alańyn dalalyq jerústi zertteý jumystary bastalady, — dep jazylǵan jaýapta.

Vedomstvo ókilderi qazirgi tańda bul bólinetin qarjymen naqty qandaı zertteý júrgiziletini talqylanyp jatqanyn aıtty. Qarjy bólingen kúnniń ózinde jumystardy Frantsııanyń geologııalyq jáne taý-ken zertteýler bıýrosy (BRGM) júzege asyrady. Al qazaqstandyq tarap tek tapsyrys berýshi jáne baqylaýshy rólinde bolmaq. 

Eske sala ketsek, byltyr Frantsııa Balqashtyń ekologııalyq jaǵdaıyn zertteýge grant bóletini jaıly habarlandy.

Sondaı-aq Qazaqmys kompanııasy Balqashtyń ekojúıesin saqtaýǵa 5 mln dollar bóletinin málimdegen edi.