Balqashtan Almaty men Astanaǵa jańa áýe reısteriniń bıleti qansha turady
BALQASh. KAZINFORM – Bıyl jazda Balqashqa áýe qatynasy burynǵydan da qoljetimdi bola túsedi: óńirge birden eki sýbsıdııalanatyn baǵyt iske qosylady. Jańa reıster turǵyndar men týrısterge eldiń iri qalalaryna belgilengen baǵamen jyldam jetýge múmkindik beredi.
Aǵymdaǵy jyldyń maýsym aıynan tamyz aıyna deıin Almaty – Balqash – Almaty baǵyty boıynsha tikeleı áýe reısi ashylady.
– Reısterdi SKAT Airlines áýe kompanııasy aptasyna bes ret oryndaıdy. Baǵytta syıymdylyǵy 50 jolaýshyǵa deıingi Bombardier CRJ200 ushaqtary paıdalanylady. Bir baǵyttaǵy bılet quny 16 myń teńgeni quraıdy, – dep habarlady Qaraǵandy oblysynyń jolaýshylar kóligi jáne avtomobıl joldary basqarmasynda.
Osy kezeńde Astana – Balqash – Astana baǵyty boıynsha kúndelikti áýe qatynasy da jolǵa qoıylady. Tasymaldaýshy QAZAQ Air áýe kompanııasy bolady, ol syıymdylyǵy 78-den 86 jolaýshyǵa deıingi Bombardier Dash 8 Q400 áýe kemelerin paıdalanady. Bul baǵyttaǵy bılet quny da bir baǵytqa 16 myń teńgeni quraıdy.
Eki baǵyt ta memleket tarapynan sýbsıdııalanady. Reısterdi iske qosý óńirdiń kólik qoljetimdiligin arttyrýǵa jáne Balqashtyń týrıstik áleýetin damytýǵa baǵyttalǵan. Bul óz kezeginde bolashaqta týrıster aǵynyn kóbeıtip, ınvestıtsııa tartýǵa yqpal etedi dep kútilýde.
Buǵan deıin Astana men Aqtaýdan Erevanǵa jańa áýe reısterin ashý josparlanyp otyrǵany habarlanǵan bolatyn. Bul Qazaqstan Respýblıkasynyń kólik mınıstri Nurlan Saýranbaev pen Armenııa Respýblıkasynyń aýmaqtyq basqarý jáne ınfraqurylym mınıstri Davıd Hýdatıannyń kezdesýi barysynda yntymaqtastyq áleýetin talqylaýdan keıin belgili boldy.
